Welcome to navstat   Click to listen highlighted text! Welcome to navstat Powered By GSpeech

Davlat statistika qo`mitasi markaziy apparatida “Call centre” tashkil etilgan. Murojaat uchun telefon: (+998 71) 203-80-00

Портал

 

     Yangiliklarimizga obuna    bo'ling


 

Oʻzbekiston Respublikasi Prezidenti Shavkat Mirziyoyev raisligida sanoat tarmoqlaridagi 9 oylik natijalar va yil yakunigacha bajarilishi lozim boʻlgan vazifalar muhokamasi boʻyicha videoselektor yigʻilishi oʻtkazildi.

Pandemiya oqibatlari sanoat ishlab chiqarish surʼatlariga ham taʼsir oʻtkazmay qolmadi. Shu bois davlatimiz tomonidan har bir tarmoqni qoʻllab-quvvatlash boʻyicha tezkor choralar koʻrildi. Karantin davrida ham ishlab chiqarish davom etdi. Bularning natijasida sanoatda yuzaga kelishi mumkin boʻlgan jiddiy yoʻqotishlarning oldi olindi.

Eʼtiborlisi, iqtisodiyotda yuqori qoʻshilgan qiymatni taʼminlovchi qayta ishlash sanoatida 9 oyda qariyb 3 foiz oʻsish qayd etildi. Xususan, elektr texnikasi ishlab chiqarish 25 foiz, toʻqimachilik mahsulotlari 12 foiz, metall rudalari qazish 7 foiz va qurilish materiallari 6 foizga oʻsdi.

Shuningdek, avtomobillar 1,5 baravar, elektr texnikasi mahsulotlari 1,3 barobar, toʻqimachilik tovarlari 16 foiz, mis sim 15 foiz koʻp eksport qilindi.

Natijada yalpi ichki mahsulotning oʻsish surʼati 0,4 foiz ijobiy darajada saqlab qolindi va byudjet daromadi 1,9 trillion soʻm ortigʻi bilan bajarilishiga erishildi.

Shu bilan bir qatorda, ayrim tarmoq va hududlarda ishlab chiqarishda qoloqlikka yoʻl qoʻyilgani oqibatida sanoat mahsulotlari boʻyicha umumiy koʻrsatkich 2,7 foizga kamaygan.

Yigʻilishda bunga sabab boʻlgan omillar tanqidiy tahlil qilinib, yil yakunigacha ishlab chiqarish hajmlarini taʼminlash chora-tadbirlari koʻrib chiqildi. Shu bilan birga, sanoat tarmoqlari va hududlarda yana qanday zaxiralar borligi, ularni ishga solish uchun nimalar qilish kerakligi batafsil muhokama qilindi. Pirovard maqsad – eksport, daromad, manfaat.

– Sanoat korxonalari boshqaruv tizimida muammolar bor. Mahsulotlar tannarxini tushirish kerak. Bu raqobat muhitini yaratishning muhim asosidir, – deya taʼkidladi Prezident.

Avval neft-gaz tarmogʻidagi ishlar tahlil qilindi. Qoloqlikka yoʻl qoʻygan korxonalar faoliyati tanqidiy baholanib, rahbarlarning lavozimlariga loyiqlik masalasi koʻrib chiqildi.

Yil yakuni bilan tabiiy gaz qazib olishni koʻpaytirish, ichki bozorga qoʻshimcha gaz yetkazib berish boʻyicha topshiriqlar berildi. Shuningdek, 740 ming tonna neft va kondensat qazib olish, 203 ming tonna suyultirilgan gaz va 125 ming tonna polietilen ishlab chiqarish vazifasi qoʻyildi.

“Oʻzkimyosanoat” korxonalarida hali rezervlar mavjudligi, ishlab chiqarish hajmini oshirib, eksportga yoʻnaltirish zarurligi taʼkidlandi. Qoʻqon superfosfat zavodining birinchi bosqichini modernizatsiya qilish, “Navoiyazot” aksiyadorlik jamiyatida ammiak va karbamid kompleksini ishga tushirish choralari belgilandi.

“Oʻzavtosanoat” boshqaruviga oʻtgan qishloq xoʻjaligi mashinasozligi tarmogʻida traktor va seyalkalar ishlab chiqarish 2 barobar kamaygani koʻrsatib oʻtildi. IV chorakda avtomobillar ishlab chiqarishni 62 mingtaga yetkazib, 165 million dollarlik eksport qilish, butlovchi va ehtiyot qismlarni xorijiy bozorlarga sotishni yoʻlga qoʻyish zarurligi aytildi. Xalqaro ekspertlar bilan birga avtomobil sanoatini rivojlantirish strategiyasini ishlab chiqish vazifasi qoʻyildi.

Qurilish materiallari, elektr texnikasi va yengil sanoatda ham hali ishlatilmagan zaxiralar bor.

Masalan, qurilish materiallari boʻyicha yil yakunigacha 11 ta loyiha amalga oshiriladi. Bu orqali yangi mahsulotlar oʻzlashtirilib va mavjud korxonalar quvvati oshirilib, import oʻrnini qoplashga erishiladi.

Elektr texnikasi sanoatida 12 xil mahsulotni mahalliylashtirish loyihasi rejalashtirilgan. Davlatimiz rahbari ushbu quvvatlarni tezroq ishga tushirib, raqobatni taʼminlash, tovarlar narxini arzonlashtirib, eksportni kengaytirish muhimligini aytdi.

“Oʻztoʻqimachiliksanoat” uyushmasiga mavjud quvvatlarni toʻla ishga solish, 100 dan ziyod yangi korxonaga AQSH va Yevropada tan olingan xalqaro sertifikatlar olishda koʻmaklashib, ularni eksportga jalb qilish vazifasi qoʻyildi.

Bozor mexanizmlari toʻliq kirib bormagan tarmoqlarni transformatsiya qilish dolzarb boʻlib bormoqda. Shu bois Prezidentimiz sanoat korxonalari faoliyatini takomillashtirish, xalqaro boshqaruv tizimini joriy etish boʻyicha koʻrsatmalar berdi.

Yigʻilishda hududiy sanoat korxonalarida mavjud rezervlardan foydalanib, qoʻshimcha ishlab chiqarishni yoʻlga qoʻyish masalalari ham muhokama qilindi.

Oʻtgan 9 oyda mahalliylashtirish borasida 55 ta hududiy loyiha ijrosi kechikkan, 144 ta loyiha boʻyicha ishlab chiqarish hajmi taʼminlanmagan. Oqibatda 720 milliard soʻmlik mahsulot tayyorlash imkoniyati yoʻqotilgan.

Tegishli vazirlik va hokimliklarga qoloqlikka yoʻl qoʻyilgan loyihalardagi muammolarni bartaraf etish, import oʻrnini bosuvchi yangi istiqbolli yoʻnalishlarni oʻrganib, mahalliylashtirish dasturiga kiritish boʻyicha koʻrsatmalar berildi.

Umuman, qolgan uch oyda qiymati 7 milliard dollarlik 80 ta tarmoq va 44 ta hududiy yirik loyihani ishga tushirish muhimligi taʼkidlandi.

Yigʻilishda ishlab chiqarishni kengaytirish orqali eksport hajmini oshirish masalasiga alohida eʼtibor qaratildi.

– Bugun eksportchi korxonalarni moliyaviy qoʻllab-quvatlashni kengaytirish boʻyicha farmonni imzoladim. Endi bunday korxonalar uchun yangi tashkil qilinayotgan Eksportni qoʻllab-quvvatlash jamgʻarmasi orqali qoʻshimcha mablagʻlar ajratiladi. Shu maqsadda jamgʻarmaga 100 million dollar berilmoqda. Bu, oʻz navbatida, mahsulotlarni tashqi bozorlarga uzluksiz yetkazib berish uchun korxonalarning aylanma mablagʻlariga yoʻnaltiriladi, – dedi Shavkat Mirziyoyev.

Bosh vazir oʻrinbosarlariga bu boradagi vazifalarni tezkor, samarali va manzilli hal qilib borib, yil yakuniga belgilangan koʻrsatkichlarni taʼminlash boʻyicha topshiriqlar berildi.

Yigʻilishda muhokama qilingan masalalar yuzasidan tarmoq va hudud rahbarlari hisobot berdi.

 

 

O'zA
 

 

Oʻzbekiston Respublikasi Prezidentining

q a r o r i

 

 

Iqtisodiyot sohalarida va aholi punktlarida hosil boʻladigan maishiy va qurilish chiqindilari bilan bogʻliq ishlarni boshqarish tizimini yana-da takomillashtirish, chiqindilarni qayta ishlashda yuqori texnologiyalar qoʻllaniladigan ishlab chiqarishlarni joriy etish, shuningdek, qulay investitsiya muhitini yaratish orqali ushbu sohaga tadbirkorlik subyektlarini keng jalb qilish hamda davlat-xususiy sheriklik loyihalarini amalga oshirish uchun qulay shart-sharoitlar yaratish maqsadida:

 

1. Ekologiya va atrof-muhitni muhofaza qilish davlat qoʻmitasi (keyingi oʻrinlarda – Davlat ekologiya qoʻmitasi), Davlat-xususiy sheriklikni rivojlantirish agentligi va Davlat aktivlarini boshqarish agentligining hududlarda maishiy chiqindilar bilan bogʻliq ishlarni amalga oshirishda davlat-xususiy sheriklikning yangi modelini bosqichma-bosqich joriy etish toʻgʻrisidagi takliflari maʼqullansin.

Bunda, davlat sherigi – Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda Davlat ekologiya qoʻmitasining hududiy organlari bilan xususiy sherik oʻrtasida tuziladigan davlat-xususiy sheriklik toʻgʻrisidagi bitimga muvofiq:

a) davlat sherigi tomonidan:

maishiy chiqindilarni toʻplash va olib chiqib ketish boʻyicha xizmat koʻrsatish uchun tegishli hududlar xususiy sherikka biriktirib beriladi;

davlat korxonalari hisobidagi chiqindi poligonlari chiqindilarni saralash va qayta ishlash boʻyicha texnologiyalarni tatbiq etgan holda qoʻshimcha ravishda kapital qoʻyilmalar va investitsiyalarni jalb qilish sharti bilan xususiy sherikka uzoq muddatga foydalanishga beriladi;

maishiy chiqindilar bilan bogʻliq ishlarni amalga oshirish sohasida xizmat koʻrsatishga ixtisoslashgan davlat korxonalari hisobidagi maxsus avtotransport vositalari va texnikalari xususiy sherikka yetti yilgacha muddatga boʻlib-boʻlib toʻlash sharti bilan baholovchi tashkilotlar tomonidan belgilangan narxlarda sotiladi hamda loyiha yakuni boʻyicha toʻlovlar toʻliq toʻlab boʻlinganidan soʻng ularni tasarruf etish huquqi xususiy sherikka oʻtkaziladi;

b) xususiy sherik tomonidan quyidagi majburiyatlar olinadi:

oʻziga biriktirib berilgan hududda yashovchi aholining qattiq maishiy chiqindilarni toʻplash va olib chiqib ketish boʻyicha xizmatlar bilan toʻliq qamrab olinishini taʼminlash;

davlat-xususiy sheriklik bitimiga muvofiq investitsiyalar kiritish va sanitariya jihatidan tozalash infratuzilmasini rivojlantirish;

maxsus avtotransport vositalari va texnikalari harakati hamda chiqindi poligonlarini real vaqt rejimida davlat sherigi tomonidan nazorat qilish imkonini yaratish;

qattiq maishiy chiqindilarni toʻplash va olib chiqib ketish boʻyicha xizmatlar uchun jismoniy va yuridik shaxslardan tasdiqlangan narxlarda majburiy toʻlovlar yigʻilishini va ularning hisobini yuritish boʻyicha davlat sherigi tomonidan yaratilgan yagona elektron tizimga ulanilishini taʼminlash;

davlat-xususiy sheriklik bitimida belgilangan muddatlarda chiqindilarni saralash (qayta ishlash) texnologiyalarini oʻrnatib, ishga tushirish.

2. 2020-2021-yillarda maishiy chiqindilarni toʻplash va olib chiqib ketish xizmatlarini koʻrsatish sohasida amalga oshiriladigan davlat-xususiy sheriklik loyihalari boʻyicha “yoʻl xaritasi” 1-ilovaga muvofiq tasdiqlansin.

3. Davlat ekologiya qoʻmitasi Davlat-xususiy sheriklikni rivojlantirish agentligi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda:

a) quyidagilarga erishilishini taʼminlasin:

aholini maishiy chiqindilarni toʻplash va olib chiqib ketish boʻyicha xizmatlar bilan qamrab olish darajasini joriy yil yakuniga qadar 90 foizga, 2021-yil yakuniga qadar 100 foizga yetkazish;

qattiq maishiy chiqindilarni qayta ishlash hajmini joriy yil yakuniga qadar 21,8 foizga, 2021-yil yakuniga qadar 36,5 foizga yetkazish;

 

maishiy chiqindilarni toʻplash va olib chiqib ketish xizmatlarini tashkil etish sohasida xususiy sektor ulushini 2022-yil yakuniga qadar
50 foizga yetkazish;

 

b) davlat-xususiy sheriklik loyihalari doirasida maxsus avtotransport vositalari va texnikalarni sotishdan kelib tushadigan mablagʻlarning maxsus bank hisob raqamida jamlanishini taʼminlasin hamda ularni maxsus avtotransport vositalari va texnikalar parkini yangilashga, shuningdek, xalqaro moliya institutlaridan davlat kafilligi ostida olinadigan kredit mablagʻlari boʻyicha majburiyatlarni soʻndirishga yoʻnaltirsin.

4. Belgilansinki 2021-yil 1-yanvardan boshlab:

hududlarda maishiy chiqindilarni toʻplash va olib chiqib ketish boʻyicha xizmat koʻrsatish uchun majburiy toʻlov tariflari (xizmat koʻrsatuvchi tashkilotlar tomonidan kelishilgan narxlarda amalga oshiriladigan alohida xizmatlar uchun toʻlovlar bundan mustasno) dastlab narxlarni (tariflarni) tartibga solish organlari xulosalari olinib, keyinchalik tegishligicha Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari qarorlari bilan maʼqullanganidan soʻng tasdiqlanadi;

maishiy chiqindilar bilan bogʻliq ishlarni kompleks amalga oshirish klasterlariga xizmat koʻrsatish uchun belgilangan tartibda biriktirib berilgan hududlarda ikkilamchi xom ashyoni (metall parchalari va chiqindilarini sotib olishdan tashqari) qabul qilish shoxobchalari orqali tayyorlash (sotib olish, qabul qilish) mazkur klasterlar tomonidan amalga oshiriladi (mazkur hududda qayta ishlovchi tashkilotlarning ikkilamchi xom ashyoni oʻzlariga tegishli shoxobchalar orqali sotib olishi yoki qabul qilishi bundan mustasno);

maishiy chiqindilarni olib chiqib ketish xizmatini koʻrsatish jarayonida, shuningdek, maishiy chiqindilarni toʻplash shoxobchalari va saralash punktlaridan maishiy chiqindilar tarkibidagi ikkilamchi xom ashyoni maishiy chiqindilar bilan bogʻliq ishlarni amalga oshirish sohasida xizmat koʻrsatishga ixtisoslashgan tashkilotlarning roziligisiz ajratib olish va oʻzlashtirish taqiqlanadi;

maishiy chiqindilarni tashish, saralash, utilizatsiya qilish va qayta ishlash uchun tegishli texnologiya va quvvatlarga ega klasterlarning yangilanib boruvchi roʻyxati, shuningdek, ularga xizmat koʻrsatish uchun biriktirib berilgan hududlar toʻgʻrisidagi maʼlumotlar Davlat ekologiya qoʻmitasi tomonidan shakllantiriladi hamda uning rasmiy veb-saytida joylashtiriladi.

5. Shunday tartib joriy etilsinki, unga muvofiq 2021-yil 1-yanvardan boshlab:

a) binolar va inshootlar, shu jumladan, yoʻllar va muhandislik kommunikatsiyalarini qurish, rekonstruksiya qilish, taʼmirlash yoki buzish ishlarida (keyingi oʻrinlarda – qurilish ishlari) hosil boʻladigan qurilish chiqindilari birinchi navbatda takroriy foydalanish, qayta ishlashga yoki utilizatsiya qilishga yoʻnaltiriladi;

 

b) qurilish ishlari amalga oshirilayotgan obyekt joylashgan hududda (tuman yoki shahar) qurilish chiqindilarini utilizatsiya qilish
va qayta ishlash uchun tegishli texnologiya va quvvatlarga ega korxonalar mavjud boʻlmagan taqdirdagina ularni belgilangan tartibda chiqindi poligonlariga joylashtirishga yoʻl qoʻyiladi;

 

v) qurilish ishlari boʻyicha loyiha hujjatlarini ishlab chiqishda qurilish jarayonida hosil boʻladigan qurilish chiqindilari hajmlarini va ularni toʻplash joylarini belgilash, shuningdek, ular bilan bogʻliq ishlarni amalga oshirish boʻyicha loyihaviy yechimlar nazarda tutiladi;

g) yangi quriladigan koʻp xonadonli uylar joylashishi rejalashtirilgan turar joy zonalarida:

maishiy chiqindilarni toʻplash shoxobchalarini tashkil etishga boʻlgan talab maishiy chiqindilar bilan bogʻliq ishlarni amalga oshirish sohasida mazkur hududga xizmat koʻrsatuvchi ixtisoslashgan tashkilot bilan birgalikda oʻrganiladi va qurilish uchun yer uchastkalarini ajratish (tanlash) materiallari, loyihaoldi va loyiha hujjatlarining atrof-muhitga taʼsirini baholash materiallarida nazarda tutiladi;

xonadonlar soni 300 tadan ortiq boʻlgan koʻp qavatli uy-joylar maishiy chiqindilarni toʻplash shoxobchalari bilan taʼminlanmagan boʻlsa, foydalanishga qabul qilishga ruxsat berilmaydi;

d) qurilish ishlarini amalga oshirish natijasida hosil boʻlgan qurilish chiqindilarining mulkdori boʻlgan yuridik va jismoniy shaxslarga quyidagi majburiyatlar yuklanadi:

qurilish ishlari olib borilayotgan obyektlarda hosil boʻladigan chiqindilarni saralangan holda toʻplash va vaqtincha saqlash;

qurilish chiqindilarini ularni toʻplash, tashish, utilizatsiya qilish va (yoki) qayta ishlash bilan shugʻullanuvchi yuridik shaxslarga topshirish, realizatsiya qilish yoxud bu ishlarni oʻz kuchi bilan amalga oshirish;

qurilish chiqindilari poligonlarga joylashtiriladigan taqdirda chiqindilarni olib chiqib ketish boʻyicha xizmat koʻrsatishga ixtisoslashgan tashkilotlar yoki chiqindi poligoniga ega boʻlgan tashkilotlar bilan tegishli shartnoma tuzish;

 

ye) qurilish chiqindilarini tashish bilan shugʻullanuvchi yuridik
yoki jismoniy shaxslar mazkur xizmatlarni koʻrsatishda ularning qurilish chiqindilarini utilizatsiya qilish va (yoki) qayta ishlash bilan shugʻullanuvchi tashkilotlarga topshirish (realizatsiya qilish) yoxud chiqindi poligoniga joylashtirishni nazarda tutuvchi hujjatlarga ega boʻlishi lozim.

 

6. Quyidagilar:

2020-2021-yillarda mahalliy byudjetlar mablagʻlari hisobidan qurilish va maishiy chiqindi poligonlarini qurish hamda jihozlash boʻyicha manzilli dasturlar 2 va 3-ilovalarga muvofiq;

Qoraqalpogʻiston Respublikasi Vazirlar Kengashi va viloyatlar hokimliklari tomonidan 2020-2021-yillarda chiqindilar bilan bogʻliq ishlarni amalga oshirish sohasida erishilishi taʼminlanadigan maqsadli indikatorlar 4.1-4.13-ilovalarga muvofiq tasdiqlansin.

 

Oʻzbekiston Respublikasi Prezidentining 2017-yil 21-apreldagi
PQ-2916-son qarori bilan tashkil qilingan Chiqindilar bilan bogʻliq ishlarni amalga oshirish tizimini muvofiqlashtirish va takomillashtirish boʻyicha Respublika komissiyasiga (Ramatov) mazkur bandda nazarda tutilgan manzilli dasturlarga va maqsadli indikatorlarga oʻzgartishlar kiritish huquqi berilsin.

 

7. Belgilab qoʻyilsinki, 2021-yil 1-yanvardan boshlab:

aholi tomonidan Davlat ekologiya qoʻmitasining Internet tarmogʻidagi maxsus axborot tizimiga yuborilgan ekologiya, atrof-muhitni muhofaza qilish va tabiatdan foydalanish sohasidagi huquqbuzarliklar haqidagi fotosuratlar va videoyozuvlar Maʼmuriy javobgarlik toʻgʻrisidagi kodeksda belgilangan tartibda koʻrib chiqiladi;

huquqbuzarlik holatlari toʻgʻrisidagi fotosuratlar va videoyozuvlarni yuborgan shaxslar huquqbuzardan undirilgan jarima miqdorining oʻn besh foizi miqdoridagi pul mukofoti bilan ragʻbatlantiriladi;

 

huquqbuzarlik holatlari toʻgʻrisida yuborilgan fotosuratlar
va videoyozuvlardagi huquqbuzarlarning shaxsini aniqlash Davlat ekologiya qoʻmitasining hududiy organlari soʻroviga asosan ichki ishlar organlari tomonidan amalga oshiriladi;

 

huquqbuzarlik holatlari toʻgʻrisidagi fotosuratlar, videoyozuvlar va xabarlarni taqdim etgan shaxslar toʻgʻrisidagi maʼlumotlarning oshkor etilishiga yoʻl qoʻyilmaydi.

8. Davlat ekologiya qoʻmitasi:

Axborot texnologiyalari va kommunikatsiyalarini rivojlantirish vazirligi bilan birgalikda 2021-yil 1-yanvarga qadar barcha hududlardagi aholiga atrof-muhit, shu jumladan, maishiy va qurilish chiqindilari bilan bogʻliq ishlar holati ustidan jamoatchilik nazoratini amalga oshirish imkonini beruvchi, bu boradagi huquqbuzarliklar toʻgʻrisidagi foto va video materiallarni joylashtirish imkoniyatiga ega boʻlgan Internetdagi maxsus axborot tizimini yaratish hamda har bir xabar berilgan holat boʻyicha tezkor choralar koʻrish tizimining joriy qilinishini taʼminlasin;

chiqindilar bilan bogʻliq ishlarni amalga oshirishda ekologik tarbiya va targʻibotni samarali tashkil etish hamda jamoatchilik ekologik nazoratini amalga oshirishda fuqarolar, nodavlat notijorat tashkilotlar hamda ommaviy axborot vositalari bilan yaqindan hamkorlik qilsin;

ekologiya va atrof-muhitni muhofaza qilish holati haqida jamoatchilik xabardorligini oshirishga qaratilgan axborot-tahlil va media materiallarini tayyorlash, ekologik madaniyatni oshirish, huquqbuzarliklarning oʻz vaqtida oldini olish choralarini kuchaytirsin;

Mahalla va oilani qoʻllab-quvvatlash vazirligi bilan birgalikda fuqarolarning oʻzini oʻzi boshqarish organlari tomonidan ekologik nazoratning jamoatchi inspektorlari tizimini shakllantirish ishlarini muvofiqlashtirsin.

9. Davlat ekologiya qoʻmitasi Bandlik va mehnat munosabatlari vazirligi bilan birgalikda:

“Ishga marhamat” monomarkazlari hamda Bandlik va mehnat munosabatlari vazirligi tizimidagi kasb-hunarga oʻqitish markazlarida zamonaviy koʻnikmalar asosida chiqindilarni qayta ishlash bilan shugʻullanuvchi xodimlarni tayyorlashni, qayta tayyorlashni va malakasini oshirishni hamda bu borada ishsiz fuqarolarning bandligini;

chiqindilarni qayta ishlash jarayoniga chet eldan yangi texnologiyalar jalb etilgan taqdirda, ulardan foydalanishga oʻrgatish boʻyicha “Ishga marhamat” monomarkazlari va kasb-hunarga oʻqitish markazlaridagi taʼlim jarayonlariga mazkur texnologiyalarni ishlab chiqaruvchi tashkilotlar vakillari yoki ulardan foydalanish koʻnikmalari mavjud boʻlgan yetuk xorijiy mutaxassislar, shu jumladan, videokonferensaloqa vositalari orqali jalb etilishini taʼminlab borsin.

10. Davlat ekologiya qoʻmitasi Atrof-muhitni muhofaza qilish sohasida faoliyat koʻrsatayotgan xodimlarni qayta tayyorlash va ularning malakasini oshirish markazida (keyingi oʻrinlarda – Markaz) maishiy chiqindilar bilan bogʻliq ishlarni amalga oshirish sohasida xizmat koʻrsatishga ixtisoslashgan tashkilotlar mutaxassislarini qayta tayyorlash va malakasini oshirish boʻyicha oʻquv kurslarini yoʻlga qoʻysin.

Belgilansinki, 2022-yil 1-yanvarga qadar maishiy chiqindilar bilan bogʻliq ishlarni amalga oshirish sohasida xizmat koʻrsatishga ixtisoslashgan xususiy tashkilotlar mutaxassislarini Markazda qayta tayyorlash va malakasini oshirish xarajatlarining 50 foizi Davlat ekologiya qoʻmitasining Ekologiya, atrof-muhitni muhofaza qilish va chiqindilar bilan bogʻliq ishlarni amalga oshirish jamgʻarmasi mablagʻlari hisobidan qoplab beriladi.

11. Iqtisodiy taraqqiyot va kambagʻallikni qisqartirish vazirligi, Investitsiyalar va tashqi savdo vazirligi “Oʻzavtosanoat” AK bilan birgalikda uch oy muddatda respublikada ishlab chiqarilayotgan maishiy chiqindilarni tashishga moʻljallangan maxsus texnikalar tannarxlarini qayta koʻrib chiqib, ularni pasaytirish choralarini koʻrsin.

 

12. Davlat ekologiya qoʻmitasi Vazirlar Mahkamasiga 2021-yil
1-yanvarga qadar:

 

 

maishiy va qurilish chiqindilarini belgilanmagan joylarga tashlaganlik uchun jarima sanksiyalari miqdorini oshirish, maishiy
va qurilish chiqindilari bilan bogʻliq ishlarni amalga oshirish sohasida huquqbuzarlik sodir etganlik uchun fuqarolar va mansabdor shaxslarning javobgarligini kuchaytirishni nazarda tutuvchi qonun loyihasini;

 

Qurilish vazirligi bilan birgalikda Qurilish chiqindilari bilan bogʻliq ishlarni amalga oshirish tartibi toʻgʻrisidagi nizom loyihasini;

yangi tahrirdagi “Chiqindilar toʻgʻrisida”gi Oʻzbekiston Respublikasi qonuni loyihasini kiritsin.

13. Xalq taʼlimi vazirligi, Maktabgacha taʼlim vazirligi, Sogʻliqni saqlash vazirligi:

bir oy muddatda chiqindilarni olib chiqib ketish boʻyicha xizmat koʻrsatuvchi tashkilotlar bilan oʻz tizimidagi tashkilotlar oʻrtasidagi debitor va kreditor qarzdorlik holatini tahlil qilsin hamda ularni kamaytirish yuzasidan zarur choralarni amalga oshirsin;

 

2021-yildan boshlab byudjet tashkilotlarining xarajatlar smetalarini moliya organlarida roʻyxatdan oʻtkazishda maishiy chiqindilarni toʻplash va olib chiqib ketish boʻyicha kommunal xizmatlar haqini toʻlash va chiqindi konteynerlarini xarid qilish bilan bogʻliq xarajatlarga yetarli byudjet mablagʻlari nazarda tutilishini
nazorat qilsin.

 

14. Ichki ishlar vazirligi Davlat ekologiya qoʻmitasi, Transport vazirligi, Davlat soliq qoʻmitasi, Sanitariya-epidemiologik osoyishtalik va jamoat salomatligi xizmati, Qoraqalpogʻiston Respublikasi Vazirlar Kengashi, viloyatlar hamda Toshkent shahar hokimliklari bilan birgalikda:

ushbu qaror va chiqindilar bilan bogʻliq ishlarni amalga oshirish sohasidagi boshqa qonun hujjatlari talablariga rioya etilishi yuzasidan nazorat va targʻibot ishlarini kuchaytirsin;

maishiy chiqindilar bilan bogʻliq ishlarni kompleks amalga oshirish klasterlariga biriktirilgan hududlarda chiqindilarni tayyorlash (sotib olish, qabul qilish), tashish va realizatsiya qilish bilan bogʻliq faoliyatga oid qonun hujjatlari talablariga rioya etilishi ustidan nazorat oʻrnatsin.

15. Maishiy va qurilish chiqindilari bilan bogʻliq ishlarni boshqarish tizimini yana-da takomillashtirish maqsadida mazkur qaror quyidagi tartibda ijro etilsin:

a) Bosh vazirning birinchi oʻrinbosari – Chiqindilar bilan bogʻliq ishlarni amalga oshirish tizimini muvofiqlashtirish va takomillashtirish boʻyicha respublika komissiyasi raisi A.Ramatov:

mazkur qaror ijrosining oʻz vaqtida va sifatli amalga oshirilishini taʼminlasin, hududlarga chiqqan holda belgilangan chora-tadbirlarning bajarilishini oʻrgansin, masʼul vazirlik va idoralarning samarali faoliyatini tashkil etsin hamda muvofiqlashtirsin, aniqlangan kamchiliklarni oʻz vaqtida bartaraf etib borsin;

mazkur qarorning 2 va 3-ilovalariga muvofiq chiqindilarni utilizatsiya qilish, qayta ishlash va koʻmish bilan bogʻliq ishlarni kompleks amalga oshirish boʻyicha zamonaviy chiqindi poligonlari tashkil etilishini, shuningdek, keyinchalik belgilangan tartibda oʻzlariga berish sharti bilan poligonlarni qurish ishlariga xususiy sheriklarning jalb qilinishini taʼminlasin;

2021-yil 1-iyunga qadar quyidagilarni oʻz ichiga olgan qurilish chiqindilari poligonlarini mahalliy byudjet mablagʻlari hisobidan qurish va jihozlash boʻyicha 2022-2023-yillarga moʻljallangan manzilli dasturni tasdiqlashni nazarda tutuvchi Hukumat qarori qabul qilinishini taʼminlasin:

Toshkent shahrida hosil boʻladigan qurilish chiqindilarini joylashtirish uchun Toshkent viloyatining kamida uchta hududidan qurilish chiqindi poligonlarini qurishga har biri 5 gektardan kam boʻlmagan yer maydonini belgilangan tartibda ajratish, qurish va jihozlash;

 

viloyatlar markazlari, yirik shaharlar va Nukus shahri uchun qurilish chiqindi poligonlarini qurishga 5 gektardan kam boʻlmagan
yer maydonlarini belgilangan tartibda ajratish, qurish va jihozlash;

 

 

b) Davlat ekologiya qoʻmitasi raisining birinchi oʻrinbosari
N.Oblomurodov:

 

mazkur qarorning 1-ilovasiga muvofiq hududlarda maishiy chiqindilarni toʻplash, olib chiqib ketish va qayta ishlash boʻyicha davlat-xususiy sheriklik loyihalari amalga oshirilishini taʼminlasin;

maishiy va qurilish chiqindilari bilan bogʻliq ishlarni boshqarish tizimini takomillashtirish yuzasidan belgilangan chora-tadbirlarning toʻliq amalga oshirilishini taʼminlasin hamda bu sohada davlat ekologik nazoratini kuchaytirsin;

v) Davlat-xususiy sheriklikni rivojlantirish agentligi direktori Gʻ.Xoljigitov:

loyiha tashabbuskorlariga davlat-xususiy sheriklik loyihalarini amalga oshirishda, shu jumladan, aniq loyihalarning konsepsiyalari, bitimlari hamda tender hujjatlarini ishlab chiqishda koʻmaklashsin;

mazkur sohada davlat-xususiy sheriklik loyihalari bajarilishining borishi yuzasidan monitoringni amalga oshirsin;

 

g) Qoraqalpogʻiston Respublikasi Vazirlar Kengashi Raisi
va viloyatlar hokimlari:

 

tegishli hududlarda davlat-xususiy sheriklik loyihalari amalga oshirilishida tadbirkorlik subyektlariga har tomonlama koʻmaklashsin;

mazkur qarorning 2 va 3-ilovalaridagi manzilli dasturlarni amalga oshirish uchun mahalliy byudjetdan talab etiladigan zarur mablagʻlarni oʻz vaqtida aniqlasin va ajratsin;

mazkur qarorning 4.1-4.13-ilovalariga muvofiq 2020-2021-yillarda chiqindilar bilan bogʻliq ishlarni amalga oshirish sohasidagi maqsadli indikatorlarga soʻzsiz erishilishini taʼminlasin;

2021-yilda mahalliy byudjetlar hisobidan qurilgan va xususiy sheriklar jalb etilmagan poligonlarni boshqarishni Davlat ekologiya qoʻmitasining “Toza hudud” davlat unitar korxonalariga topshirishni taʼminlasin.

 

16. Oʻzbekiston Respublikasi Prezidentining ayrim qarorlariga
5-ilovaga muvofiq oʻzgartirishlar va qoʻshimcha kiritilsin.

 

17. Davlat ekologiya qoʻmitasi manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

18. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari A.J.Ramatov zimmasiga yuklansin.

Oʻzbekiston Respublikasi

            Prezidenti                  Sh.MIRZIYOYEV

Toshkent shahri,

2020-yil 29-sentyabr

 

 

O'zA
 
 

 

Oʻzbekiston Respublikasi Prezidenti Shavkat Mirziyoyev raisligida 16-sentyabr kuni suv xoʻjaligida tejamkor texnologiyalarni joriy etish va davlat-xususiy sheriklik loyihalarini amalga oshirish chora-tadbirlari yuzasidan videoselektor yigʻilishi oʻtkazildi.

Mintaqamizda suv tanqisligi bilan bogʻliq vaziyat yildan-yilga murakkablashib bormoqda. Oxirgi 10 yilda, misol uchun, Oʻzbekistonda suv hajmi 12 foizga, oʻtgan yilgiga nisbatan esa bu yil 15 foizga kamaygan.

Paxta va gʻalla yetishtirish uchun sarflanayotgan elektr energiyasi hamda suvni yetkazib berish xarajatlari ham koʻp. Xususan, 2,5 million gektar maydonni sugʻorish uchun 5 mingdan ziyod nasos ishlatilib, yiliga 8 milliard kilovatt soat energiya va 2,4 trillion soʻm byudjet mablagʻlari sarflanmoqda. Bir gektar maydonga suvni nasoslar orqali yetkazib berish uchun byudjetdan oʻrtacha 800 ming soʻm xarajat qilinyapti. Egatlab sugʻorish oqibatida yiliga qariyb 5-6 milliard kub metr yëki 20 foiz suv dalada behuda sarflanmoqda.

Bunday sharoitda suvni tejash va hisobini yuritish har doimgidan ham dolzarb masalaga aylandi. Oʻtgan ikki yilda Prezident va hukumatning shu sohaga doir 11 ta qarori qabul qilinib, hamma sharoit yaratib berildi.

Lekin, yigʻilishda taʼkidlanganidek, bajarilgan ishlar imkoniyat darajasida emas. Masalan, shu paytgacha 285 ming gektar, yaʼni bor-yoʻgʻi 7 foiz yerda suv tejovchi texnologiyalar joriy etilgan. Bu borada, ayniqsa, Qashqadaryo, Buxoro, Xorazm viloyatlarida qoloqlik bor. Furqat, Boʻka, Chinoz, Sardoba, Taxtakoʻpir, Qoraoʻzak, Kasbi, Qiziriq, Muzrabot tumanlarida suv tejovchi birorta ham loyiha tatbiq qilinmagan.

Shu bois videoselektorda suv xoʻjaligidagi ishlar Qoraqalpogʻiston Respublikasi, viloyat va tumanlar kesimida tanqidiy tahlil qilinib, galdagi muhim vazifalar muhokama etildi. Kelgusi yilda suv tejovchi texnologiyalarni joriy etishni 600 ming gektarga yetkazish reja qilib qoʻyildi. Buning uchun davlat byudjetidan zarur mablagʻ yoʻnaltirish, tashabbuskorlar xarajatining bir qismini qoplash uchun subsidiya berish, shuningdek, xalqaro moliya tashkilotlari resurslarini jalb qilib, salohiyatli fermer xoʻjaliklari va klasterlarga tijorat banklari orqali kredit ajratish yuzasidan koʻrsatmalar berildi.

Suv tejovchi texnologiyalar qamrovi kengayishi bilan ularni ishlab chiqarishga ham talab oshadi. Biroq, yurtimizda shunga ixtisoslashgan 13 ta korxonaning quvvati kelgusi yil ehtiyojining yarmini qoplashga ham yetmaydi. Shu bois mutasaddilarga Samarqand, Toshkent va Namangan viloyatlarida suv tejovchi texnologiyalar uchun uskunalar ishlab chiqaruvchi korxonalar tashkil etish vazifasi qoʻyildi.

Sohadagi yana bir innovatsiya – klasterlar 3 ming gektardan ziyod ekin maydonini lazer yordamida tekislash orqali suv sarfini 20-25 foiz, oʻgʻitni 15 foiz tejashga, hosildorlikni kamida 10 foizga oshirishga erishgan. Davlatimiz rahbari bu tajribani keng qoʻllab, paxta, gʻalla va sholi maydonlarini lazer yordamida tekislash muhimligini taʼkidladi. Moliya vazirligiga ushbu texnologiyani joriy qilishga Qishloq xoʻjaligi jamgʻarmasidan kamida 250 milliard soʻm kredit ajratish topshirildi.

Joriy yilda Quyichirchiq, Narpay, Bulungʻur, Sardoba, Nishon, Kasbi tumanlarida suv xoʻjaligi obyektlari xususiy sheriklik asosida tadbirkorlarga berilib, namunaviy loyiha amalga oshirilmoqda. Bu orqali mazkur inshootlar modernizatsiya qilinib, ekspluatatsiya xarajatlari anchayin qisqaradi. Yigʻilishda bunday loyihalarni boshqa hududlarda ham joriy etish boʻyicha topshiriqlar berildi.

Suv isrofiga sabab boʻlayotgan muammolardan yana biri shuki, bugungi kunda 3 mingdan ziyod suv oʻlchash postlarining atigi 2 foizi, 400 ta yirik suv obyektining 2,5 foizida boshqarish tizimi avtomatlashgan, xolos. Shu bois Suv xoʻjaligi vazirligiga yil yakunigacha 150 ta, kelgusi yildan barcha oʻlchash postlarida suvni onlayn rejimda nazorat qiluvchi avtomatlashgan tizim joriy etish vazifasi yuklatildi.

Maʼlumki, bu yildan qishloq xoʻjaligi korxonalariga suv soligʻi boʻyicha berilgan imtiyozlar bekor qilindi. Shu bilan birga, suvdan foydalanganlik uchun soliq stavkasi 50 foizga pasaytirildi. Prezident ushbu kamaytirilgan stavkani kelgusi yilda ham saqlab qolish zarurligini taʼkidladi.

Sugʻorish meʼyorlarini hisoblash metodikasini BMTning Oziq-ovqat va qishloq xoʻjaligi tashkiloti (FAO) talablariga moslashtirish, suv hisoblagichlar oʻrnatgan isteʼmolchilarni ragʻbatlantirish yuzasidan vazifalar belgilandi.

“Oʻzbekbaliqsanoat” uyushmasiga kollektor suvlarida baliqchilikni rivojlantirish boʻyicha topshiriq berildi.

Namangan tajribasi asosida gidrogeologik qidiruvlarni kengaytirib, yerosti suvlaridan samarali foydalanish zarurligi qayd etildi.

Yigʻilishda suv xoʻjaligi sohasida fan va taʼlimni rivojlantirish masalasiga alohida ahamiyat qaratildi. Irrigatsiya va melioratsiya obyektlarini barpo etish hamda rekonstruksiya qilish ishlariga ilmiy xodimlarni biriktirish muhimligi taʼkidlandi. Bu orqali fan namoyandalari obyektlarning loyihaoldi hujjatlarini tayyorlashdan ularni foydalanishga topshirishgacha boʻlgan jarayonlarda qatnashib, qurilish ishlarini ilmiy-texnik jihatdan kuzatib boradi. Fan va amaliyot uygʻunligi taʼminlanib, kelgusidagi loyihalar puxta ishlab chiqilishida qoʻl keladi.

Videoselektor yigʻilishida muhokama qilingan masalalar yuzasidan mutasaddi vazirlik va idoralar rahbarlari, viloyat va tuman hokimlari axborot berdi.

 
O'zA

Oʻzbekiston Respublikasi Prezidenti Shavkat Mirziyoyev 15-sentyabr kuni Rossiya Federatsiyasi Hukumati Raisining oʻrinbosari Aleksey Overchukni qabul qildi.

Uchrashuv avvalida davlatimiz rahbari koronavirus infeksiyasining global miqyosda tarqalishi bilan bogʻliq zamonaviy xavf-xatarlarga qaramay mamlakatlarimiz oʻrtasidagi faol muloqot davom etayotgani va koʻp qirrali Oʻzbekiston-Rossiya hamkorligi surʼati saqlab qolinayotganini katta mamnuniyat bilan qayd etdi.

Oʻzaro tovar ayirboshlash koʻrsatkichlari ortayotgani kuzatilmoqda, iqtisodiyotning turli tarmoqlarida kooperatsiya loyihalari amalga oshirilyapti, qoʻshma korxonalar soni koʻpaydi.

Oʻzbekiston Prezidenti koronavirus pandemiyasiga qarshi kurashishda yaqin va samarali hamkorlik yoʻlga qoʻyilganini alohida taʼkidladi.

Rossiya Hukumati Raisining oʻrinbosari Aleksey Overchuk uchrashuv oʻtkazish imkoniyati uchun davlatimiz rahbariga minnatdorlik bildirdi hamda Rossiya Federatsiyasi Prezidenti Vladimir Putin va Hukumati Raisi Mixail Mishustinning salomi va eng ezgu tilaklarini yetkazdi.

Uchrashuvda oliy darajada erishilgan kelishuvlarni amalga oshirish doirasida hamkorlikni yana-da rivojlantirishning dolzarb masalalari koʻrib chiqildi.

Iqtisodiy kooperatsiya boʻyicha uzoq muddatli dastur tayyorlash, qoʻshma investitsiya loyihalarini ilgari surish, mamlakatlarimiz hududlari oʻrtasidagi amaliy aloqalarni faollashtirishga alohida eʼtibor qaratildi.

Oʻzbekiston-Rossiya strategik sheriklik munosabatlari kun tartibini yangi mazmun bilan boyitish maqsadida hamkorlikdagi ustuvor dastur va loyihalarni jadallashtirish muhimligi taʼkidlandi.

Shuningdek, mamlakatimizning Yevroosiyo iqtisodiy ittifoqi bilan hamkorligi va MDH doirasidagi yaqin muloqotlarni davom ettirish masalalari yuzasidan fikr almashildi.

 

 

OʻzA

 

 

Oʻzbekiston Respublikasi Prezidentining

q a r o r i

Mamlakatimizda soʻnggi yillarda koʻrilgan choralar natijasida qishloq xoʻjaligi mahsulotlarining eksporti 2017-yilga nisbatan 2019-yilda 2 baravarga koʻpayishiga, yiliga 10 million tonnadan ortiq sabzavot, 17 million tonnadan ortiq boshqa dehqonchilik mahsulotlari va 2,5 million tonna goʻsht yetishtirishga erishildi.

Shu bilan birga, yetishtirilayotgan qishloq xoʻjaligi mahsulotlarining xalqaro standartlar va xavfsizlik talablariga toʻliq javob bermasligi, oziq-ovqat ishlab chiqaruvchilar va eksportyorlar orasida oʻzaro munosabatlar toʻgʻri yoʻlga qoʻyilmaganligi mamlakatning eksport salohiyatini oshirish va yangi bozorlarni ochishda toʻsqinlik qilmoqda.

Meva-sabzavot, goʻsht, sut va boshqa qishloq xoʻjaligi oziq-ovqat mahsulotlarini xalqaro sifat standartlari asosida qayta ishlash hajmlarini oshirish, ichki hamda tashqi bozorlarda raqobatbardosh boʻlgan mahalliy oziq-ovqat mahsulotlari turlarini ishlab chiqarishni davlat tomonidan qoʻllab-quvvatlash tizimini joriy etish hamda aholini sifatli va xavfsiz oziq-ovqat mahsulotlari bilan taʼminlashni yana-da yaxshilash maqsadida:

1. Qishloq xoʻjaligi vazirligiga quyidagi qoʻshimcha vazifalar yuklatilsin:

meva-sabzavot, goʻsht, sut va boshqa qishloq xoʻjaligi oziq-ovqat mahsulotlarini yetishtiruvchi (ishlab chiqaruvchi) korxonalar bilan ushbu mahsulotlarni qayta ishlovchi, tayyorlovchi va realizatsiya qiluvchi korxonalar oʻrtasida oʻzaro manfaatli munosabatlar uchun sharoitlar yaratish;

mahalliy oziq-ovqat mahsulotlarining raqobatbardoshligini oshirish va ularni diversifikatsiya qilish, hududlarning mavjud tabiiy va iqtisodiy resurslaridan unumli foydalanish asosida oziq-ovqat sanoatini rivojlantirishning strategiya va modellarini ishlab chiqish;

meva-sabzavot, goʻsht, sut va boshqa qishloq xoʻjaligi oziq-ovqat mahsulotlarini qayta ishlovchi tadbirkorlik subyektlarini qoʻllab-quvvatlashning moliyaviy va nomoliyaviy choralari – yangi vositalar va axborot tizimlarini yaratish, yuqori samara beruvchi yoʻnalishlarda loyihalarni amalga oshirish;

oziq-ovqat sanoatining rivojlanishiga xususiy va toʻgʻridan-toʻgʻri chet investitsiyalar oqimining taʼsirini tahlil qilish, prognozlash va bu borada tegishli takliflarni ishlab chiqish;

zamonaviy savdo va logistika markazlarini tashkil etish, mahalliy oziq-ovqat mahsulotlarini jahon bozorlarida ilgari surish, ularning raqobatbardoshligini oshirish, eksport salohiyatini kengaytirish hamda import hajmini kamaytirish choralarini koʻrish.

2. Mazkur qarorga asosan yuklatilayotgan qoʻshimcha vazifalarni samarali amalga oshirish uchun Qishloq xoʻjaligi vazirligi markaziy apparati tuzilmasida:

Qishloq xoʻjaligi mahsulotlarini qayta ishlash va infratuzilmani rivojlantirish boshqarmasi negizida boshqaruv xodimlarining cheklangan soni 12 ta shtat birligidan iborat Oziq-ovqat sanoatini rivojlantirish bosh boshqarmasi tashkil etilsin;

vazir oʻrinbosari – Oziq-ovqat sanoatini rivojlantirish bosh boshqarmasi boshligʻi lavozimi joriy qilinsin.

Bunda, Oziq-ovqat sanoatini rivojlantirish bosh boshqarmasining 8 ta shtat birligi qoʻshimcha shtat birliklarini kiritish hisobiga shakllantiriladi.

3. Qishloq xoʻjaligi vazirligi, Moliya vazirligi, Iqtisodiy taraqqiyot va kambagʻallikni qisqartirish vazirligining Alkogol va tamaki bozorini tartibga solish hamda vinochilikni rivojlantirish agentligining Vinochilikni rivojlantirish jamgʻarmasi hisobidan 20 milliard soʻm miqdoridagi mablagʻlarni Qishloq xoʻjaligi vazirligining Qishloq xoʻjaligini rivojlantirish va oziq-ovqat taʼminoti jamgʻarmasi (keyingi oʻrinlarda – Jamgʻarma)ga oʻtkazib berish toʻgʻrisidagi taklifi maʼqullansin.

4. Quyidagilar Jamgʻarma mablagʻlarini sarflashning qoʻshimcha yoʻnalishlari etib belgilansin:

oziq-ovqat mahsulotlarini ishlab chiqarish boʻyicha yangi tashkil etilayotgan istiqbolli loyihalarning texnik-iqtisodiy asoslanishini tayyorlash bilan bogʻliq xarajatlarning 50 foizini, lekin har bir loyiha uchun 100 million soʻmdan koʻp boʻlmagan miqdorda qoplash;

oziq-ovqat mahsulotlarini ishlab chiqarish boʻyicha yangi tashkil etilayotgan istiqbolli loyihalarning infratuzilmasini taʼminlash bilan bogʻliq xarajatlarning 50 foizini, lekin har bir loyiha uchun 100 million soʻmdan koʻp boʻlmagan miqdorda qoplash;

oziq-ovqat mahsulotlarini yetishtirish va ularni chuqur qayta ishlash sohasiga xorijiy ekspertlarni jalb qilish bilan bogʻliq xarajatlarning 50 foizini, lekin har bir loyiha uchun 50 million soʻmdan koʻp boʻlmagan miqdorda qoplash.

Qishloq xoʻjaligi vazirligi Moliya vazirligi, Iqtisodiy taraqqiyot va kambagʻallikni qisqartirish vazirligi bilan birgalikda bir oy muddatda mazkur bandda nazarda tutilgan qoʻllab-quvvatlash choralarini taqdim etish tartibi boʻyicha takliflarni Vazirlar Mahkamasiga kiritsin.

5. Iqtisodiy taraqqiyot va kambagʻallikni qisqartirish vazirligi, Moliya vazirligi, Davlat aktivlarini boshqarish agentligi va “Oʻzbekoziqovqatxolding” XKning:

“Oʻzbekoziqovqatxolding” XKni tugatish;

“Oʻzbekoziqovqatxolding” XK Oziq-ovqat sanoati korxonalarini rivojlantirish, rekonstruksiya qilish va modernizatsiyalash jamgʻarmasining tugatish yakunlariga koʻra qoldiq mablagʻlarini Jamgʻarmaga oʻtkazish toʻgʻrisidagi takliflariga rozilik berilsin.

6. “Oʻzbekoziqovqatxolding” XKni tugatish komissiyasi 1-ilovaga muvofiq tarkibda tuzilsin.

7. Moliya vazirligi sut mahsulotlarini qayta ishlash quvvatlarini tashkil etish uchun Hukumat kafolati ostida jalb etilgan xalqaro moliya institutlari va xorijiy banklar oldidagi tugatilayotgan “Oʻzbekoziqovqatxolding” XKning qarz mablagʻlarini grafik boʻyicha toʻlab borilishini taʼminlasin.

8. Investitsiyalar va tashqi savdo vazirligi, Qishloq xoʻjaligi vazirligi tijorat banklari bilan birgalikda:

oziq-ovqat mahsulotlarini yetishtirish, qayta ishlash va eksport qilish tizimini moliyaviy qoʻllab-quvvatlash uchun xalqaro moliya institutlari mablagʻlarining keng jalb qilinishini;

xalqaro moliya institutlarining jalb qilingan mablagʻlari Qoraqalpogʻiston Respublikasi va viloyatlar kesimida mahsulot yetishtiruvchilar, qayta ishlovchi va eksport qiluvchi tashkilotlarga manzilli yetib borishini taʼminlasin.

9. Iqtisodiy taraqqiyot va kambagʻallikni qisqartirish vazirligi, Oliy va oʻrta maxsus taʼlim vazirligi Qishloq xoʻjaligi vazirligi hamda boshqa manfaatdor vazirlik va idoralarning kadrlarga boʻlgan ehtiyojlari asosida 2021/2022 oʻquv yilidan boshlab respublika oliy taʼlim muassasalarining “5321000-Oziq-ovqat texnologiyasi (mahsulotlar turlari boʻyicha)” hamda “5410500-Qishloq xoʻjalik mahsulotlarini saqlash va dastlabki ishlash texnologiyasi (mahsulotlar turlari boʻyicha)” taʼlim yoʻnalishlari boʻyicha bakalavriatning kunduzgi va sirtqi taʼlim shakllariga oʻqishga qabul qilishning davlat buyurtmasi parametrlarini bosqichma-bosqich oshirib borish choralarini koʻrsin.

Qishloq xoʻjaligi vazirligi:

bir oy muddatda tegishli taʼlim yoʻnalishlari (mutaxassisliklar)da soha boʻyicha tahsil olayotgan talabalarning amaliyotlarini oʻtash obyektlari – ish beruvchi tashkilotlar toʻgʻrisidagi maʼlumotlar bazasini shakllantirsin;

Oliy va oʻrta maxsus taʼlim vazirligi bilan birgalikda 2020-yil 1-dekabrga qadar oziq-ovqat texnologiyalari sohasida zamonaviy texnika va texnologiyalarni joriy etgan yetakchi korxona, tashkilotlar va muassasalar bilan talabalarning amaliyotlarini oʻtash yuzasidan oʻzaro hamkorlik oʻrnatish toʻgʻrisida tegishli chora-tadbirlarni amalga oshirsin.

10. Ushbu qarorda belgilangan chora-tadbirlarning samarali va oʻz vaqtida amalga oshirilishini taʼminlash maqsadida:

a) Bosh vazir oʻrinbosari Oʻ.Barnoyev:

bir hafta muddatda qishloq xoʻjaligi vaziri oʻrinbosari – Oziq-ovqat sanoatini rivojlantirish bosh boshqarmasi boshligʻi lavozimiga yuklangan vazifalarni professional darajada bajarishga qodir boʻlgan, zarur nazariy bilim va amaliy koʻnikmalarga ega yuqori malakali nomzod boʻyicha Oʻzbekiston Respublikasi Prezidenti Administratsiyasiga taklif kiritsin;

bir oy muddatda hududlarning mavjud tabiiy va iqtisodiy resurslarini hisobga olgan holda qishloq xoʻjaligi mahsulotlarini yetishtirish va ularni qayta ishlash boʻyicha tumanlarning diversifikatsiyalanishini taʼminlasin;

b) Qishloq xoʻjaligi vazirligi (Xodjayev):

bir oy muddatda Oziq-ovqat sanoatini rivojlantirish bosh boshqarmasi faoliyatini yoʻlga qoʻyish boʻyicha Hukumat qarori loyihasini Vazirlar Mahkamasiga kiritsin;

bir oy muddatda Oziq-ovqat sanoatini rivojlantirish bosh boshqarmasini tanlov asosida zarur nazariy bilim va amaliy koʻnikmalarga ega zamonaviy menejment va marketing usullarini egallagan yuqori malakali kadrlar bilan toʻldirsin;

ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisidagi takliflarni Vazirlar Mahkamasiga kiritsin;

Iqtisodiy taraqqiyot va kambagʻallikni qisqartirish vazirligi (Norqulov) hamda Davlat bojxona qoʻmitasi (Azimov) bilan birgalikda uch oy muddatda oziq-ovqat sanoatida import qilinayotgan tovarlar turi, tasnifi, miqdori, narxi hamda ushbu mahsulotlarni ishlab chiqarayotgan mahalliy korxonalar boʻyicha doimiy yangilanib boradigan maʼlumotlar bazasini yaratsin va uni oʻzining rasmiy veb-saytida joylashtirsin;

v) Qishloq xoʻjaligi vazirligi (Xodjayev) Iqtisodiy taraqqiyot va kambagʻallikni qisqartirish vazirligi (Norqulov) hamda Moliya vazirligi (Ishmetov) bilan birgalikda:

uch oy muddatda ilgʻor xorijiy tajribani oʻrgangan holda qishloq xoʻjaligi oziq-ovqat mahsulotlarini ishlab chiqarish, qayta ishlash va realizatsiya qilish, savdo-logistika hamda saqlash markazlarini tashkil etishni qoʻllab-quvvatlash mexanizmlarini yana-da takomillashtirish boʻyicha takliflarni ishlab chiqsin va Vazirlar Mahkamasiga kiritsin;

 

2021-yil 1-yanvarga qadar respublikada qishloq xoʻjaligi oziq-ovqat mahsulotlariga mavjud ichki talabni hisobga olgan holda 2021-2023 yillarga moʻljallangan sanoatbop qishloq xoʻjaligi mahsulotlari yetishtirishni kengaytirish dasturini ishlab chiqsin
va tasdiqlasin;

 

2021-yil 1-martga qadar meva-sabzavot, goʻsht, sut va boshqa qishloq xoʻjaligi oziq-ovqat mahsulotlarini qayta ishlashni jadal rivojlantirish dasturi ishlab chiqilishi va tasdiqlanishini taʼminlasin;

g) Bosh vazir oʻrinbosari S.Umurzoqov qishloq xoʻjaligi mahsulotlarini qayta ishlash va ularning eksport hajmlarini oshirish maqsadida xalqaro moliya institutlari mablagʻlarini jalb qilish choralarini koʻrsin;

 

d) Qoraqalpogʻiston Respublikasi Vazirlar Kengashi, viloyatlar
va tuman (shahar) hokimliklari bir oy muddatda hududlarning mavjud tabiiy va iqtisodiy resurslarini hisobga olgan xolda oziq-ovqat mahsulotlarini yetishtirish va ularni qayta ishlash boʻyicha investitsion loyihalar tashabbuskorlarini aniqlasin va loyihalarni ishga tushirish uchun doimiy amaliy yordam koʻrsatib borsin;

 

ye) Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi (Xodjayev) Oʻzbekiston Milliy axborot agentligi, Oʻzbekiston Milliy teleradiokompaniyasi va “Dunyo” axborot agentligi bilan birgalikda ommaviy axborot vositalarida tadbirkorlik subyektlarini jalb qilgan holda qarorda belgilangan tadbirlarni aholi orasida keng yoritish choralarini koʻrsin.

11. Oʻzbekiston Respublikasi Prezidentining 2019-yil 17-apreldagi “Oʻzbekiston Respublikasi Qishloq xoʻjaligi vazirligi faoliyatini takomillashtirish toʻgʻrisida”gi PQ-4292-son qaroriga 2-ilovaga muvofiq oʻzgartirishlar kiritilsin.

12. Oʻzbekiston Respublikasi Prezidentining 2016-yil 18-fevraldagi “Respublika oziq-ovqat sanoatini boshqarishni tashkil etishni yana-da takomillashtirish chora-tadbirlari toʻgʻrisida”gi PQ-2492-son qarori oʻz kuchini yoʻqotgan deb hisoblansin.

13. Ushbu qarorning ijrosini nazorat qilish Oʻzbekiston Respublikasining Bosh vaziri A.N.Aripov va Oʻzbekiston Respublikasi Prezidenti Administratsiyasi rahbari Z.Sh.Nizomiddinov zimmasiga yuklansin.

Oʻzbekiston Respublikasi

          Prezidenti                              Sh.MIRZIYOYEV

Toshkent shahri,

2020-yil 9-sentyabr

 
O'zA
OVOZ BERISH
Ishonch telefonlarining xizmatini baholang:
 
A'lo
Yaxshi
Qoniqarli
Yomon

Моё мнение

Korrupsiyaga qarshi kurash

Tugmani bosing Tinglash