Welcome to navstat   Click to listen highlighted text! Welcome to navstat Powered By GSpeech

MDH sammiti oldidan samarali uchrashuvlar

 
Ashxobod, 10-oktyabr. OʻzA maxsus muxbiri Ziyodulla JONIBEKOV xabar qiladi.
 
Oʻzbekiston Respublikasi Prezidenti Shavkat Mirziyoyev Mustaqil Davlatlar Hamdoʻstligi Davlat rahbarlari kengashining navbatdagi majlisida ishtirok etish uchun 10-oktyabr kuni Ashxobod shahriga keldi.
 
Ashxobod xalqaro aeroportida oliy martabali mehmonni Turkmaniston Vazirlar Mahkamasi Raisi oʻrinbosari Esenmurat Orazgeldiyev kutib oldi.
 
Oʻzbekiston Respublikasi Prezidenti Shavkat Mirziyoyev Turkmaniston Prezidenti Gurbanguli Berdimuhamedov bilan uchrashdi.
 
Suhbatda davlatimiz rahbari Turkmaniston Prezidentini Mustaqil Davlatlar Hamdoʻstligiga samarali raislik qilgani bilan tabriklab, tashkilot sammiti muvaffaqiyatli oʻtishini tiladi.
 
Uchrashuvda oliy darajada erishilgan kelishuvlarni amalga oshirish doirasida mamlakatlarimiz oʻrtasidagi koʻp qirrali hamkorlikni yanada kengaytirish va strategik sheriklik munosabatlarini mustahkamlash istiqbollari muhokama qilindi.
 
Shuningdek, xalqaro siyosat va mintaqaviy hamkorlikka doir dolzarb masalalar yuzasidan fikr almashildi.
 
Shu kuni Oʻzbekiston Respublikasi Prezidenti Shavkat Mirziyoyev Ashxobod shahrida Moldova Respublikasi Prezidenti Igor Dodon bilan uchrashdi.
 
photo5257996962488233245.jpg
 
Uchrashuvda mamlakatlarimiz oʻrtasida uzoq muddatli ishbilarmonlik aloqalarini yoʻlga qoʻyish va amaliy hamkorlikni rivojlantirish muhimligi qayd etildi.
 
Oʻzaro almashinuvlarni faollashtirish hamda turli tarmoqlar uchun istiqbolli loyihalarni birgalikda ishlab chiqishga kelishib olindi.
 
Xalqaro va mintaqaviy tashkilotlar doirasidagi hamkorlikni kengaytirish masalalari ham muhokama qilindi.
 
MDH sammitining asosiy tadbirlari 11-oktyabr kuni boʻlib oʻtadi.
 
Jahon miqyosida jadal oʻzgarishlar roʻy berayotgan, global xatar va tahdidlar kuchayib borayotgan bugungi kunda Mustaqil Davlatlar Hamdoʻstligining ahamiyati naqadar dolzarb ekanini davrning oʻzi isbotlamoqda.
 
Prezident Shavkat Mirziyoyev taʼkidlaganidek, koʻp qirrali hamkorlikni mustahkamlash uchun muhim boʻlgan ushbu platforma bugungi kunda aʼzo davlatlarning oʻzaro manfaatlaridan kelib chiqqan holda, toʻgʻridan-toʻgʻri muloqot olib borish va dolzarb mavzular muhokamasi jarayonida fikr almashish singari imkoniyatlarni taqdim etmoqda.
 
Majlisda Hamdoʻstlik doirasida koʻp tomonlama hamkorlikni rivojlantirish va mustahkamlashga qaratilgan kompleks masalalarni muhokama qilish, shuningdek, tomonlarni qiziqtirgan xalqaro muammolar yuzasidan fikr almashish rejalashtirilgan.
 
Sammit yakunida bir qator hujjatlar, jumladan, 2020-yilda MDHda raislikning Oʻzbekiston Respublikasiga oʻtishi toʻgʻrisida qaror, Strategik iqtisodiy hamkorlik toʻgʻrisida deklaratsiya, 1941-1945-yillarda Ulugʻ Vatan urushida qozonilgan Gʻalabaning 75 yilligi munosabati bilan MDHga aʼzo davlatlar rahbarlarining Hamdoʻstlik mamlakatlari xalqlari va xalqaro hamjamiyatga murojaati, 2020-2022-yillarda terrorizm, ekstremizm hamda zoʻravonlikning boshqa koʻrinishlariga qarshi kurashish boʻyicha hamkorlik dasturini qabul qilish koʻzda tutilgan.

Oʻzbekiston Respublikasi Prezidenti Shavkat Mirziyoyev 7-oktyabr kuni xorijiy mamlakatlar bilan erishilgan kelishuvlar ijrosi, yangi investitsiyaviy va ijtimoiy-iqtisodiy loyihalar muhokamasiga bagʻishlangan yigʻilish oʻtkazdi.

Dastlab Birlashgan Arab Amirliklari bilan hamkorlikdagi investitsiya loyihalarining ijrosi koʻrib chiqildi. Joriy yil mart oyida davlatimiz rahbarining ushbu mamlakatga rasmiy tashrifi juda samarali boʻlgan, erishilgan kelishuvlarni amalga oshirish boʻyicha aprel oyida “yoʻl xaritasi” ishlab chiqilgan edi.
Undan koʻplab istiqbolli loyihalar oʻrin olgan. 300 million dollar evaziga Samarqand shahri infratuzilmasini rivojlantirish, Navoiy viloyatida 200 million dollarlik shamol va 150 million dollarlik quyosh elektr stansiyalari qurish, 203 million dollar evaziga Sirdaryo viloyatida sellyuloza, omuxta yem va qurilish materiallari ishlab chiqaruvchi agrosanoat klasteri tashkil etish loyihalari shular jumlasidandir. Mutasaddilar investitsiya oʻzlashtirilishi boshlangan loyihalar ijrosining borishi boʻyicha hisobot berdi. Shuningdek, neft-gaz, kimyo, energetika, meva-sabzavotlarni qayta ishlash sohalaridagi istiqbolli loyihalar muhokama qilindi.

Davlatimiz rahbari bu boradagi ishlarning, qurilajak zavod va korxonalarning iqtisodiy va ijtimoiy ahamiyatiga eʼtibor qaratib, ularni tez va puxta amalga oshirish lozimligini taʼkidladi. Yangi loyihalar boʻyicha muzokaralarni yakunlash, qurilish ishlarini boshlash boʻyicha tegishli topshiriqlar berdi.Maʼlumki, joriy yil oxirida Prezidentimizning Yaponiyaga tashrifi rejalashtirilgan boʻlib, unga tayyorgarlik doirasida Tokio bilan energetika, transport, qishloq xoʻjaligi, xizmat koʻrsatish sohalariga doir kelishuvlarga erishilgan.
Kimyoviy mahsulotlar ishlab chiqarish, yapon texnologiyalari asosida elektrostansiya qurish, suv tozalash va suv taʼminoti tizimini modernizatsiya qilish, shahar qatnoviga moʻljallangan elektrobuslar ishlab chiqarishga oid loyihalar boʻyicha muzokaralar olib borilmoqda. Ushbu oliy darajadagi tashrifga tayyorgarlik hamda Yaponiya bilan savdo-iqtisodiy va investitsiyaviy hamkorlik holati boʻyicha maʼlumot berildi.

Yigʻilishda joriy yil yanvar-sentyabr oylarida eksport va investitsiya prognoz koʻrsatkichlarining ijrosi holati va yil yakuni boʻyicha ushbu yoʻnalishlarda amalga oshirilishi zarur boʻlgan choralar ham koʻrib chiqildi. Toʻqqiz oylikda eksport hajmi qariyb 10 milliard AQSH dollarini tashkil etib, reja oshigʻi bilan bajarildi. Eksport nomenklaturasi 74 ta yangi turdagi mahsulot, geografiyasi 42 mamlakatga kengaydi. Oʻsish surʼati asosan meva-sabzavotchilik, toʻqimachilik, avtomobilsozlik, energetika tarmoqlari hissasiga toʻgʻri keldi.
Shu bilan birga, ayrim tashkilot va hududlarda rejalashtirilgan prognoz bajarilmagani qayd etildi. Yil yakuniga qadar bu boradagi qoloqlikni bartaraf etish, barcha tarmoq va hududlar boʻyicha eksport prognozini bajarish yuzasidan topshiriqlar berildi.
Yigʻilishda Qoʻqon va Margʻilon shaharlarini 2020-2022 yillarda kompleks ijtimoiy-iqtisodiy rivojlantirish dasturi ham muhokama qilindi. Dasturga muvofiq, Qoʻqon shahrida umumiy qiymati 420 million dollarlik 250 ta, Margʻilon shahrida 192 million dollarlik 172 ta loyiha amalga oshirilishi belgilangan. Ajratilayotgan investitsiyalar ushbu shaharlar infratuzilmasini rivojlantirish, ijtimoiy sharoitlarni yaxshilash va yangi turar joylar qurishga yoʻnaltiriladi. Prezidentimiz mazkur uch yoʻnalish Qoʻqon va Margʻilon shaharlarini har tomonlama yangilash, odamlar hayot sifatini oshirishda muhim ahamiyatga ega ekanini taʼkidladi.
Toshkent shahrida oʻtkazilgan Turkiy tilli davlatlar Ishbilarmonlar kengashi va investitsiya forumi yakunlariga ham eʼtibor qaratildi. Avval berilgan topshiriqlar ijrosi yuzasidan mutasaddilarning axboroti tinglandi va kelgusida amalga oshiriladigan ustuvor vazifalar belgilab olindi.

 

O'zA

Oʻzbekiston Respublikasi Prezidentining

q a r o r i

Jismonan sogʻlom, maʼnan yetuk, mustaqil fikrlaydigan, chuqur bilim va zamonaviy dunyoqarashga ega Vatanimizning taqdiri va kelajagi uchun masʼuliyatni oʻz zimmasiga olishga qodir boʻlgan barkamol yosh avlodni tarbiyalash hamda voyaga yetkazish uchun mamlakatimizda keng koʻlamli ishlar olib borilmoqda.

Shu bilan birga, yoshlar taʼlim-tarbiyasi uchun qoʻshimcha sharoitlar yaratishga qaratilgan kompleks chora-tadbirlarni oʻz ichiga olgan beshta tashabbusni amaliyotga tatbiq etish, respublikamizda jadal surʼatlar bilan amalga oshirilayotgan ijtimoiy-siyosiy, sotsial-iqtisodiy va boshqa sohalardagi islohotlar ulgʻayib kelayotgan oʻspirin iqtidorini yanada rivojlantirish, yuqori malakali kadrlarni tayyorlash, yurt ravnaqi yoʻlida ularning faol ishtirokini taʼminlashni bugungi kunning ustuvor vazifalaridan biri etib belgilamoqda.

Xalq taʼlimi tizimidagi maktabdan tashqari taʼlim samaradorligini yanada oshirish, oʻquvchi-yoshlarda yuksak maʼnaviy fazilatlarni kamol toptirish, ularning boʻsh vaqtlarini mazmunli tashkil etish, kasb-hunarga yoʻnaltirish orqali mustaqil hayotga tayyorlash, intellektual barkamol avlodni tarbiyalash maqsadida, shuningdek, Oʻzbekiston Respublikasi Prezidentining 2018-yil 5-sentyabrdagi “Xalq taʼlimi tizimiga boshqaruvning yangi tamoyillarini joriy etish chora-tadbirlari toʻgʻrisida”gi PQ-3931-son qaroriga muvofiq:

1. Oʻzbekiston Respublikasi Xalq taʼlimi vazirligi, Moliya vazirligi, Turizmni rivojlantirish davlat qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining:

 

Oʻzbekiston Respublikasi Xalq taʼlimi vazirligi tasarrufidagi
texnik ijodiyot, badiiy ijodiyot, oʻlkashunoslik va ekologiya boʻyicha “Barkamol avlod” respublika bolalar markazlari negizida Respublika “Barkamol avlod” bolalar maktabini;

 

“Barkamol avlod” tuman (shahar) bolalar markazlari, Qoraqalpogʻiston Respublikasi, viloyatlar va Toshkent shahar “Barkamol avlod” bolalar markazlari negizida “Barkamol avlod” bolalar maktablarini;

Qoraqalpogʻiston Respublikasi Xalq taʼlimi vazirligi va viloyatlar xalq taʼlimi boshqarmalari huzuridagi axborot-resurs markazlari negizida “Bolalar kutubxonalari”ni;

2020-2023 yillarda Buxoro, Qashqadaryo, Namangan, Samarqand, Xorazm viloyatlari va Toshkent shahrida tizimli ravishda bolalar turizmini rivojlantirish maqsadida “Barkamol avlod” bolalar maktablari huzurida 100-200 oʻrinli “Bolalar sayyohlik bazalari”ni tashkil etish toʻgʻrisidagi takliflari maʼqullansin.

2. Belgilansinki:

“Bolalar kutubxonalari” umumtaʼlim muassasalari kutubxonalariga amaliy va uslubiy yordam koʻrsatish, oʻquvchilarning milliy va jahon bolalar badiiy adabiyotlari durdona asarlariga boʻlgan ehtiyojini aniqlash, ularni kitob mutolaasi va kitobxonlik madaniyatini oshirishga qaratilgan targʻibot-tashviqot ishlarini amalga oshirish, madaniy-maʼrifiy tadbirlarni (“Yosh kitobxon”, “Kitobxon maktab”, “Eng yaxshi kutubxonachi” va boshqalar) tashkil etishga koʻmaklashish;

“Bolalar sayyohlik bazalari” “Barkamol avlod” bolalar maktablarining “yosh sayyoh”, “yosh ekskursovod”, “yosh oʻlkashunos” toʻgarak aʼzolari uchun oʻlkamiz tarixi, qadimiy va muqaddas qadamjolar, milliy urf-odatlarimiz bilan yaqindan tanishtirish, atrof-muhitni muhofaza qilish va asrash, bolalar oʻrtasida ekologiya hamda sayohat qilish madaniyatini yuksaltirish maqsadida tashkil etiladi.

3. Quyidagilar Oʻzbekiston Respublikasi Xalq taʼlimi vazirligining maktabdan tashqari taʼlimni rivojlantirish boʻyicha asosiy vazifalari etib belgilansin:

yosh avlodni maʼnaviy barkamol etib tarbiyalash, ularning boʻsh vaqtlarini mazmunli oʻtkazishini taʼminlash, bunda ularning sanʼat, sport, axborot texnologiyalari, kitob oʻqishga qiziqishini oshirish hamda qizlarni ijtimoiy faol hayotga tayyorlashni tashkillashtirish;

zamonaviy axborot-kommunikatsiya texnologiyalarini keng qoʻllash orqali bolalarni individual rivojlantirishga qaratilgan dasturlar va uslubiy materiallarni doimiy takomillashtirib borish;

robototexnika, mexatronika, muhandislik va kompyuter dasturiy taʼminoti yoʻnalishlaridagi toʻgaraklarni doimiy rivojlantirib borish;

bolalar va taʼlim turizmlarini rivojlantirishga qaratilgan loyihalarni amalga oshirish;

oʻquvchi-yoshlarning ijodiy ishlarini ommalashtirish, shu jumladan, dunyo bozoriga milliy anʼanalarimiz asosida “Barkamol avlod” bolalar maktablarining toʻgarak aʼzolari tomonidan yaratilgan mahsulotlarni olib chiqish maqsadida “Art shop” elektron doʻkonlarini tashkil etish va sotuvini yoʻlga qoʻyish;

maktabdan tashqari taʼlim muassasalariga oʻquvchilar qamrovini oshirish, oʻquvchilar qiziqishlariga koʻra toʻgaraklarni tashkil etish va doimiy faoliyat olib borishini taʼminlash;

bolalarda kasbni egallash boʻyicha dastlabki bilim va koʻnikmalarni shakllantirish, tarmoq toʻgaraklari faoliyatini metodik taʼminlash, kitobxonlik madaniyatini oshirish uchun maktabdan tashqari taʼlim muassasalari faoliyatini zamonaviy taʼlim dasturlari orqali takomillashtirish;

yetakchi tashkilotlar va oliy taʼlim muassasalari bilan birgalikda “Barkamol avlod” bolalar maktablarida robototexnika va texnik ijodiyot yoʻnalishida foydalanadigan xomashyolar roʻyxatini shakllantirish va yangilab borish;

bolalar texnik ijodkorligini rivojlantirish uchun xorijiy davlatlarning ilgʻor tajribalari asosida “Barkamol avlod” bolalar maktablarida davlat-xususiy sheriklik shartlari asosida “Bolalar texnoparki” loyihalarini tashkil etish;

“Barkamol avlod” bolalar maktablari va “Bolalar kutubxonalari”ning xalqaro hamda respublika tanlovlari gʻoliblarini munosib ragʻbatlantirish mexanizmlarini yoʻlga qoʻyish;

tizimda ilmiy va amaliy tajriba almashish ishlarini olib borish maqsadida xorijiy mamlakatlarda xodimlarning malaka oshirishi hamda maqsadli xizmat safarlarini tashkil etish;

 

bolalar oʻrtasida kitob mutolaasi va kitobxonlik madaniyatini rivojlantirish, koʻchma kutubxonalar faoliyatini yoʻlga qoʻyish, bolalar
va maktab kutubxonalarini badiiy adabiyotlar bilan taʼminlash tizimini takomillashtirish;

 

maktabdan tashqari taʼlim muassasalarining boʻsh turgan bino va yer maydonlaridan samarali foydalanishni taʼminlash uchun davlat-xususiy sheriklik shartlari asosida maqsadli loyihalarni amalga oshirish.

4. Quyidagilar:

2019-2021 yillarda xalq taʼlimi tizimidagi maktabdan tashqari taʼlim muassasalari faoliyatini samarali tashkil etish boʻyicha “Yoʻl xaritasi” (keyingi oʻrinlarda – “Yoʻl xaritasi”) 1-ilovaga muvofiq;

2020-2024 yillarda yangidan quriladigan, rekonstruksiya qilinadigan va mukammal taʼmirlanadigan “Barkamol avlod” bolalar maktablarining asosiy parametrlari 2-ilovaga muvofiq;

2020-2023 yillarda yangidan quriladigan, rekonstruksiya qilinadigan va mukammal taʼmirlanadigan “Bolalar kutubxonalari”ning asosiy parametrlari 3-ilovaga muvofiq tasdiqlansin.

5. Belgilansinki:

“Barkamol avlod” bolalar maktablarida 2020/2021 oʻquv yilidan boshlab “STEAM taʼlim” (Science – tabiiy fanlar, Technology – texnologiyalar, Engineering – muhandislik, Art – sanʼat, Mathematics – matematika) dasturi joriy etiladi;

eksperiment tariqasida har bir tumanda bitta umumiy oʻrta taʼlim maktablarida muassasa moddiy-texnik bazasidan kelib chiqib hamda oʻquvchilar qiziqishiga koʻra “Barkamol avlod” bolalar maktablarining tarmoq toʻgaraklari tashkil etiladi;

mazkur qarorning 4-bandida koʻrsatilgan “Barkamol avlod” bolalar maktablari va “Bolalar kutubxonalari”ni qurish, rekonstruksiya qilish, mukammal taʼmirlash, shuningdek, mazkur obyektlarni jihozlash ishlari Oʻzbekiston Respublikasining Investitsiya dasturi doirasida nazarda tutiladigan Oʻzbekiston Respublikasi Davlat byudjeti mablagʻlari hamda qonun hujjatlari bilan taqiqlanmagan boshqa manbalar hisobidan amalga oshiriladi;

2020-yil 1-yanvardan boshlab “Barkamol avlod” bolalar maktablarini maxsus asbob-uskunalar va jihozlar bilan taʼminlash ishlari Oʻzbekiston Respublikasi Davlat byudjeti parametrlarida “Taʼlim” sohasi uchun ajratilgan mablagʻlar doirasida va “Barkamol avlod” bolalar maktablarining byudjetdan tashqari mablagʻlari hisobidan amalga oshiriladi;

 

200 oʻquvchiga moʻljallangan “Barkamol avlod” bolalar maktablari,
100-200 oʻrinli “Bolalar sayyohlik bazalari”, 100 oʻquvchiga moʻljallangan “Bolalar kutubxonalari”ni yangidan qurish ishlari belgilangan tartibda Oʻzbekiston Respublikasi Xalq taʼlimi vazirligi va Qurilish vazirligi bilan kelishilgan yakka tartibda tasdiqlangan loyihalarga qatʼiy rioya qilingan holda amalga oshiriladi;

 

Oʻzbekiston Respublikasi Qurilish vazirligi tomonidan belgilangan tartibda qurilish-montaj ishlarini bajarishda shaharsozlik norma va qoidalariga rioya etilishi ustidan nazorat oʻrnatiladi.

6. Oʻzbekiston Respublikasi Moliya vazirligi, Iqtisodiyot va sanoat vazirligi, Investitsiyalar va tashqi savdo vazirligi, Xalq taʼlimi vazirligi:

Oʻzbekiston Respublikasining Investitsiya dasturi doirasida nazarda tutiladigan Oʻzbekiston Respublikasi Davlat byudjeti mablagʻlari hisobidan qurilish manzilli dasturini shakllantirishda “Barkamol avlod” bolalar maktablari, “Bolalar sayyohlik bazalari”, “Bolalar kutubxonalari”ning aniq soni va roʻyxatini koʻrsatgan holda, ularning yangilarini qurish, rekonstruksiya qilish, mukammal taʼmirlash, zarur xomashyo va inventarlar bilan jihozlash uchun zarur boʻlgan mablagʻlar ajratilishini taʼminlasin;

2020-yilda Oʻzbekiston Respublikasining Investitsiya dasturi doirasida nazarda tutiladigan Oʻzbekiston Respublikasi Davlat byudjeti mablagʻlari hisobidan manzilli dasturlarni shakllantirishda Respublika “Barkamol avlod” bolalar maktabi joylashgan bino va inshootlarni rekonstruksiya qilish orqali 200 oʻrinli “Bolalar sayyohlik bazasi” qurilishi hamda zarur xomashyo va inventarlar bilan jihozlash boʻyicha tasdiqlangan loyiha-smeta hujjatlariga muvofiq zarur boʻlgan kapital qoʻyilma limitlari ajratilishini nazarda tutsin.

7. Quyidagilarni nazarda tutuvchi 2019-2024 yillarda Xalq taʼlimi tizimidagi maktabdan tashqari taʼlim tizimini rivojlantirishning maqsadli koʻrsatkichlari 4-ilovaga muvofiq tasdiqlansin:

 

“Barkamol avlod” bolalar maktablarini 2024-yilga qadar 50 foiz
oliy maʼlumotli mutaxassislar bilan toʻldirish (jami toʻgarak rahbarlari soniga nisbatan);

 

oʻquvchilarni “Barkamol avlod” bolalar maktablariga qamrab olish darajasini 10,5 foizga yetkazish (umumtaʼlim maktablaridagi oʻquvchilar soniga nisbatan);

“Barkamol avlod” bolalar maktablarida 2024-yilga qadar davlat-xususiy sheriklik asosida robototexnika va muhandislik toʻgaraklari ulushini 10 foizga yetkazish (jami toʻgaraklar soniga nisbatan);

“Bolalar kutubxonalari” va maktab kutubxonalari uchun milliy va jahon adabiyoti durdonalariga kiruvchi asarlarning audiokitob shaklini yaratish;

barcha “Barkamol avlod” bolalar maktablari, “Bolalar kutubxonalari” va maktab kutubxonalarini keng polosali Internet tarmogʻiga ulash.

8. Oʻzbekiston Respublikasi Xalq taʼlimi vazirligi:

ikki oy muddatda “Barkamol avlod” bolalar maktablari va “Bolalar kutubxonalari” toʻgʻrisidagi namunaviy nizomlar hamda ularning tuzilmalarini belgilangan tartibda ishlab chiqsin va tasdiqlash uchun Oʻzbekiston Respublikasi Vazirlar Mahkamasiga kiritsin;

Oʻzbekiston Respublikasi Moliya vazirligi, Sogʻliqni saqlash vazirligi, Iqtisodiyot va sanoat vazirligi, Qurilish vazirligi va “Oʻzstandart” agentligi bilan birgalikda uch oy muddatda “Barkamol avlod” bolalar maktabi va “Bolalar kutubxonalari”ni namunaviy jihozlash meʼyorini ishlab chiqsin va tasdiqlasin;

2020-yil 1-yanvardan boshlab “Barkamol avlod” bolalar maktablarida robototexnika, mexatronika, muhandislik, dasturlash va xorijiy tillarni oʻrganish toʻgaraklarini davlat-xususiy sheriklik shartlari asosida tashkil etish choralarini koʻrsin;

2020-yil 1-sentyabrga qadar xorijiy ekspertlarni jalb qilgan holda Respublika “Barkamol avlod” bolalar maktabi misolida “Barkamol avlod” bolalar maktablari binolariga (shu jumladan koʻrinishiga) hamda ularning oʻquv-uslubiy va taʼlim jarayoniga boʻlgan talablarni oʻz ichiga olgan konsepsiyani ishlab chiqsin va joriy etsin.

9. Oʻzbekiston Respublikasi Xalq taʼlimi tizimidagi maktabdan tashqari taʼlim muassasalari xodimlari va toʻgarak rahbarlarini tegishli mutaxassislik yoʻnalishida malaka oshirish tizimini joriy etish maqsadida 2020-yil 1-yanvardan boshlab A.Avloniy nomidagi Xalq taʼlimi tizimi rahbar va mutaxassis xodimlarini qayta tayyorlash va malakasini oshirish institutida Maktabdan tashqari taʼlim tizimi xodimlarini qayta tayyorlash va malakasini oshirish kafedrasi (keyingi oʻrinlarda – Kafedra) tashkil etilsin.

Zamonaviy taʼlim texnologiyalari asosida, shu jumladan, masofaviy taʼlim texnologiyalarini qoʻllagan holda ixtisoslashtirilgan toʻgaraklar yoʻnalishlari boʻyicha xalq taʼlimi tizimidagi maktabdan tashqari taʼlim muassasalari xodimlarini malaka oshirishning va qayta tayyorlashning amaldagi normalariga muvofiq qayta tayyorlash va malakasini oshirish Kafedraning asosiy vazifasi etib belgilansin.

10. Belgilab qoʻyilsinki:

Kafedra faoliyatini moliyalashtirish Oʻzbekiston Respublikasi Davlat byudjetidan xalq taʼlimi xodimlarini qayta tayyorlash va ularning malakasini oshirishga yoʻnaltiriladigan mablagʻlar doirasida amalga oshiriladi;

 

Kafedra Toshkent shahri, Yunusobod tumani, Ahmad Donish koʻchasi,
72-A uy manziliga bepul joylashtiriladi.

 

11. Oʻzbekiston Respublikasi Xalq taʼlimi vazirligi, Moliya vazirligi hamda Bandlik va mehnat munosabatlari vazirligining “Barkamol avlod” bolalar maktablari xodimlarining bazaviy tarif stavkalarini 2020-yil 1-yanvardan:

direktor va direktor oʻrinbosarlari uchun 1,55 baravarga;

toʻgarak rahbari uchun 1,5 baravarga oshirish;

instruktor-uslubchilar va uslubchilar mehnatiga haq toʻlash tartibini bazaviy tarif stavkalaridan kelib chiqib amalga oshirish va ularning bazaviy tarif stavkalari miqdorlarini toʻgarak rahbarlari bazaviy tarif stavkalari miqdoriga tenglashtirish toʻgʻrisidagi taklifi maʼqullansin.

12. Oʻzbekiston Respublikasi Moliya vazirligi:

“Barkamol avlod” bolalar maktablari xodimlarining bazaviy tarif stavkalarini oshirish bilan bogʻliq xarajatlarni moliyalashtirish uchun zarur mablagʻlarni 2020-yildan boshlab Oʻzbekiston Respublikasi Davlat byudjeti xarajatlari parametrlarida nazarda tutsin;

umumiy oʻrta taʼlim maktablarida oʻquvchilar qiziqishiga koʻra “Barkamol avlod” bolalar maktablarining tarmoq toʻgaraklarini tashkil etish uchun zarur mablagʻlar manbasi yuzasidan taklif kiritsin.

 

13. Qoraqalpogʻiston Respublikasi Vazirlar Kengashi, viloyatlar
va Toshkent shahar hokimliklari:

 

“Barkamol avlod” bolalar maktablari, “Bolalar sayyohlik bazalari” va “Bolalar kutubxonalari”ni yangidan qurish uchun maydonlarni tanlashda tasdiqlangan meʼyor va parametrlarga muvofiq, qoida tariqasida, tuman va shaharlarning markazida, turar joy massivlarida joylashtirilishini hisobga olsin;

2020-2022 yillarda bolalar oʻrtasida kitob mutolaasi va kitobxonlik madaniyatini rivojlantirish maqsadida koʻchma kutubxonalar faoliyatini yoʻlga qoʻyish choralarini koʻrsin.

14. Oʻzbekiston Respublikasi Innovatsion rivojlanish vazirligi Toshkent shahar hokimligi, Xalq taʼlimi vazirligi bilan birgalikda bolalarning boʻsh vaqtlarini mazmunli tashkil etish va ular uchun shart-sharoitlar yaratish boʻyicha sherik sarmoyadorlar va tadbirkorlarni jalb qilgan holda taʼlim laboratoriyasi, robot dunyosi va turli ijodkorlik yoʻnalishlarini qamrab olgan “Kids makon” biznes loyihasini amalga oshirish choralarini koʻrsin.

15. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Oliy va oʻrta maxsus taʼlim vazirligi, Madaniyat vazirligi, Innovatsion rivojlanish vazirligi, “Hunarmand” uyushmasi robototexnika va texnik ijodiyot, badiiy ijodiyot hamda ekologiya va turizm yoʻnalishlari boʻyicha “Barkamol avlod” bolalar maktablarining kasbiy yoʻnalishlariga oid faoliyatini oʻquv-metodik jihatdan qoʻllab-quvvatlashda amaliy yordam koʻrsatsin.

16. Oʻzbekiston Respublikasi Xalq taʼlimi vazirligi Investitsiyalar va tashqi savdo vazirligi, Iqtisodiyot va sanoat vazirligi hamda Moliya vazirligi bilan birgalikda “Barkamol avlod” bolalar maktablari va “Bolalar kutubxonalari”ni rivojlantirish, moddiy-texnik bazasini yaxshilash, shu jumladan, xomashyolar xarid qilish uchun imtiyozli shartlar asosidagi xorijiy kreditlar va grantlarni jalb etish borasidagi ishlarni faollashtirsin.

17. Quyidagilarga:

Oʻzbekiston Respublikasi Bosh vazirining oʻrinbosari A.A.Abduhakimovga – ushbu qarorda nazarda tutilgan chora-tadbirlarning davlat organlari va tashkilotlari tomonidan samarali amalga oshirilishini taʼminlash;

Oʻzbekiston Respublikasi xalq taʼlimi vaziri Sh.X.Shermatovga – xalq taʼlimi tizimidagi maktabdan tashqari taʼlimni rivojlantirish boʻyicha vazifalarni toʻlaqonli amalga oshirish, Kafedra faoliyatini samarali yoʻlga qoʻyish, sohaga zamonaviy taʼlim texnologiyalarini joriy qilish, shu jumladan, yangi toʻgaraklarni tashkil qilish, “Barkamol avlod” bolalar maktablari va “Bolalar kutubxonalari”ni qurish, rekonstruksiya qilish, mukammal taʼmirlash, mazkur maktablarni jihozlash ishlari oʻz muddatlarida amalga oshirilishini taʼminlash va davlat-xususiy sheriklik loyihalarini keng joriy qilish yuzasidan shaxsiy javobgarlik yuklansin.

18. Oʻzbekiston Respublikasi Madaniyat vazirligining Toshkent shahri, Uchtepa tumani, Sakkokiy koʻchasi, 3 a-uy manzilida joylashgan bino va inshootlari tegishli hududi bilan birgalikda Respublika “Barkamol avlod” bolalar maktabini joylashtirish uchun Xalq taʼlimi vazirligiga operativ boshqaruv huquqi asosida begʻaraz oʻtkazib berilsin.

19. Oʻzbekiston Milliy axborot agentligi va Oʻzbekiston Milliy teleradiokompaniyasi ommaviy axborot vositalarida mazkur qarorning maqsad va vazifalari keng yoritilishini tashkil etsin.

20. Oʻzbekiston Respublikasi Prezidentining 2018-yil 27-sentyabrdagi PQ-3953-son qarori bilan tasdiqlangan Davlat buyurtmachilari tomonidan toʻgʻridan-toʻgʻri shartnomalar boʻyicha xarid qilinadigan tovarlar (ishlar, xizmatlar) roʻyxati quyidagi mazmundagi 301-band bilan toʻldirilsin:

“301. Xalq taʼlimi tizimidagi umumiy oʻrta va maktabdan tashqari taʼlim muassasalari uchun oʻquvchilarning muhandislik, robototexnika, mexatronika va dasturiy taʼminot yoʻnalishlari boʻyicha oʻquv mashgʻulotlarda foydalanish hamda innovatsion ishlanmalarni amalga oshirish yuzasidan respublikada ishlab chiqarilmaydigan, xorijdan olib kelinadigan xomashyolar va jihozlar”.

21. Oʻzbekiston Respublikasi Xalq taʼlimi vazirligi Adliya vazirligi, manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

22. Mazkur qarorning ijrosini nazorat qilish Oʻzbekiston Respublikasi Prezidentining maslahatchisi A.A.Abduvaxitov va Oʻzbekiston Respublikasi Bosh vazirining oʻrinbosari A.A.Abduhakimov zimmasiga yuklansin.

Oʻzbekiston Respublikasi

             Prezidenti                 Sh.MIRZIYOYEV

Toshkent shahri,

2019-yil 30-sentyabr

 
O'zA

Muhtaram ustoz va murabbiylar!

Avvalo, siz, azizlarni, taʼlim-tarbiya sohasida mehnat qilayotgan barcha pedagog xodimlarni Oʻqituvchi va murabbiylar kuni bilan chin qalbimdan tabriklab, eng ezgu tilaklarimni izhor etaman.

Ushbu qutlugʻ ayyomda barchamiz bizga ilm oʻrgatgan, hayot sabogʻini bergan jonkuyar, fidoyi oʻqituvchi va domlalarimizga chuqur hurmat bajo keltirib, chin dildan taʼzim qilamiz.

Haqiqatan ham, oʻzining koʻz nuri, qalb qoʻri, butun borligʻini yosh avlod tarbiyasiga baxsh etadigan oʻqituvchi va murabbiylar mehnati, jasorati har qanday yuksak baholarga munosibdir.

Bu haqda fikr yuritar ekanmiz, ulugʻ maʼrifatparvar bobomiz Mahmudxoʻja Behbudiyning: “Avlodlaringizga faqat bugunning emas, kelgusi zamonning ilmini oʻrgating”, degan soʻzlari beixtiyor yodimizga tushadi.

Chindan ham, dunyo miqyosida raqobat yanada kuchayib boradigan, oʻta murakkab bir davrda yashaydigan bolalarimizni kelajakka tayyorlab, sogʻlom va barkamol insonlar etib voyaga yetkazish taʼlim-tarbiya sohasi, oʻqituvchi mehnatining tub mohiyatini tashkil etadi.

Ana shu oʻtkir haqiqatni hisobga olib, biz taʼlim-tarbiya sohasidagi islohotlarni davlat siyosatining eng muhim va ustuvor yoʻnalishi darajasiga koʻtardik.

Oʻtgan qisqa davrda maktabgacha taʼlim muassasalari tarmogʻini kengaytirish, maktab taʼlimida 11 yillik tizimga oʻtish, akademik litsey va kasb-hunar kollejlarini optimallashtirish, nodavlat taʼlim xizmati koʻrsatish boʻyicha keng koʻlamli ishlarni amalga oshirdik.

Bugungi kunda sizlarning, butun el-yurtimizning qizgʻin qoʻllab-quvvatlashi bilan maktab taʼlimini rivojlantirish umummilliy maqsadga, umumxalq harakatiga aylanib bormoqda.

Buyuk allomalarimiz, atoqli shoir va adiblarimiz nomi bilan ataladigan ijod va tabiiy fanlarga ixtisoslashtirilgan maktablar, “Temurbeklar maktablari”, Prezident maktablari kabi mutlaqo yangi namunadagi zamonaviy va innovatsion taʼlim maskanlari ayni shu maqsadga xizmat qiladi.

Bu borada umumtaʼlim maktablari tizimini rivojlantirish masalasiga ustuvor ahamiyat berilmoqda. Buning tasdigʻini soʻnggi ikki yilda 238 ta yangi maktab barpo etilganida ham koʻrish mumkin. Holbuki, 2010-2016 yillarda bu sohaga yetarli eʼtibor berilmagani tufayli 99 ta maktab yopilgan edi.

Mazkur sohani rivojlantirish uchun ajratilayotgan byudjet mablagʻlari hajmi ham ortib bormoqda. Jumladan, joriy yilda maktablarga 2017-yilga nisbatan 81 foizdan ziyod mablagʻ ajratildi.

Yurtimizda bogʻcha, maktab va oliy taʼlim tizimida ishlayotgan tarbiyachilar, oʻqituvchi va domlalar mehnatini munosib qadrlash, ularning ish haqini, jamiyatdagi nufuzini oshirish boʻyicha muhim qadamlar qoʻyilmoqda.

Soha rivojiga boʻlgan ana shunday eʼtibor maktablarda oʻquv-tarbiya jarayonlarini sifat jihatidan oʻzgartirishga, oʻqituvchilar tarkibini yaxshilashga xizmat qilmoqda.

Biz taʼlim-tarbiya masalasiga kompleks yondashgan holda, bogʻcha taʼlimi bilan birga oliy taʼlim tizimini ham uzviy rivojlantirishga alohida eʼtibor bermoqdamiz.

Shu maqsadda mamlakatimizda maktabgacha taʼlim hamda oliy taʼlimni rivojlantirish dasturlari qabul qilindi va shu asosda tub islohotlar amalga oshirilmoqda.

Xususan, keyingi ikki yilda mamlakatimizda 35 ta, jumladan, 13 ta xorijiy oliy oʻquv yurti tashkil etildi. Yuzdan ortiq yangi bakalavriat taʼlim yoʻnalishlari hamda 94 ta magistratura mutaxassisligi boʻyicha kadrlar tayyorlash yoʻlga qoʻyildi.

Ana shunday chora-tadbirlar natijasida yoshlarni oliy taʼlim bilan qamrab olish darajasi uch yil burungi 9 foizdan 20 foizga oshdi. Biz yaqin kelajakda bu koʻrsatkichni 25 foizga yetkazishni oʻz oldimizga maqsad qilib qoʻyganmiz.

Yaratilayotgan imkoniyatlar tufayli Oʻzbekiston yoshlari turli sohalarda oʻz bilim va salohiyatini namoyon etib, Vatanimiz shuhratini butun dunyoga tarannum etmoqda.

Kuni kecha Rossiyaning Yekaterinburg shahrida dunyoning 80 ga yaqin mamlakatidan mohir sportchilar ishtirok etgan boks boʻyicha jahon chempionatida milliy jamoamiz vakillari yuksak azmu shijoat va mahorat namunasini koʻrsatib, birinchi oʻrinni egallagani barchamizni quvontirib, gʻurur va iftixor bagʻishlaydi.

Bunday ulkan yutuqlarni biz avvalo sizlar kabi fidoyi ustoz-murabbiylarning fidokorona mehnati natijasi sifatida qabul qilamiz.

Qadrli yurtdoshlar!

Barchamiz yaxshi tushunamizki, bugungi shiddatli zamon barcha sohalar qatorida taʼlim-tarbiya tizimini rivojlantirish boʻyicha ham oldimizga gʻoyat muhim va dolzarb vazifalarni qoʻymoqda.

Albatta, yoshlarimizning bilim olishlari uchun barcha sharoitlarni yaratish, oʻquv binolarini qurish, ularni zamonaviy jihozlash mumkin. Lekin farzandlarimizga yuksak mezonlar asosida taʼlim-tarbiya beradigan, yangicha, innovatsion fikrlaydigan muallim va oʻqituvchilarni tayyorlash – bu eng ogʻir vazifa boʻlib, juda katta mehnat va masʼuliyatni talab etadi.

Shu maʼnoda, bugungi kun oʻqituvchisi universal mutaxassis, ham oʻrgatuvchi, ham oʻrganuvchi boʻlishi, yaʼni oʻz ustida tinimsiz ishlashi, doimo izlanib yashashi kerak.

Eng muhimi, oʻqituvchi chinakam vatanparvar inson boʻlishi zarur. Qalbida oʻz kasbiga, Vataniga mehr va sadoqat kuchli boʻlgan oʻqituvchigina haqiqiy vatanparvar shaxsni tarbiyalay oladi.

Bizning barcha saʼy-harakatlarimiz “Oʻzbekistonda eng obroʻli inson muallim boʻlishi kerak” degan gʻoyani amalga oshirishga qaratilmoqda. Buning uchun davlat va jamiyat tomonidan qancha mablagʻ, resurs va imkoniyatlar zarur boʻlsa, barchasini safarbar etamiz.

Maktablarda xorijiy tillarni, axborot-kommunikatsiya texnologiyalarini oʻrgatishni takomillashtirish, oliy va oʻrta maxsus taʼlim sohasida boshqaruvni isloh qilish, yoshlarni ilm-fan sohasiga jalb etish va ularning tashabbuslarini qoʻllab-quvvatlash boʻyicha belgilangan chora-tadbirlarni samarali amalga oshirishimiz lozim.

Professional taʼlim sohasida bugungi mehnat bozori va xalqaro standartlarga toʻla mos keladigan butunlay yangi tizimga oʻtishni jadallashtirishimiz kerak.

Taʼlim muassasalarining moddiy-texnik bazasi, oʻqitish sifati va pedagog xodimlarning bilim va malakasini oshirishga qaratilgan “Zamonaviy maktab” davlat dasturini amalga oshirish doimiy eʼtiborimiz markazida boʻladi.

Barchamizga ayonki, bugungi kunda yon-atrofimizda yoshlarning qalbi va ongini zaharlab, ularni toʻgʻri yoʻldan ogʻdirishga qaratilgan xavf-xatarlar tobora kuchayib bormoqda. Bunday mafkuraviy xurujlarga qarshi milliy gʻoya asosida barchamiz birgalikda kurashmogʻimiz, oila, maktab va mahalla hamkorligini mustahkamlashimiz zarur.

Ayniqsa, bu vazifa barcha boʻgʻindagi rahbarlar, yoshlar, xotin-qizlar, nuroniylar tashkilotlari, ijodkor ziyolilarimiz, diniy ulamolar, huquq-tartibot idoralari xodimlari, butun jamiyatimiz uchun vijdon ishiga aylanishi kerak.

Aziz va muhtaram ustozlar!

Bugun taʼlim-tarbiya sohasida, hurmatli oʻqituvchi va murabbiylarimiz, farzandlarimiz hayotida yangi davr boshlanmoqda. Bu davrni yanada chuqur maʼno-mazmun bilan toʻldirib, milliy yuksalishga erishish faqat va faqat oʻzimizga, shu yoʻlda hamjihatlik bilan qattiq mehnat qilishimizga bogʻliq.

Biz xalqimizning eng katta boyligini – millionlab farzandlarimiz, jondan aziz oʻgʻil-qizlarimizning taqdirini, Oʻzbekiston istiqbolini sizlarga ishonib topshirganmiz. Va bu vazifani masʼuliyat bilan ado etib kelayotgan sizlar kabi fidoyi insonlar, kelajak bunyodkorlariga har qancha tahsin va tasannolar aytsak, arziydi.

Sizlarni Oʻqituvchi va murabbiylar kuni bilan yana bir bor tabriklab, barchangizga sihat-salomatlik, sharafli va masʼuliyatli faoliyatingizda katta muvaffaqiyatlar, xonadonlaringizga fayzu baraka tilayman.

Shavkat MIRZIYOYEV,

Oʻzbekiston Respublikasi Prezidenti

 

 

 
O'zA

O‘zbekiston Respublikasi Prezidentining

f a r m o n i

O‘zbekiston Respublikasining Soliq siyosatini takomillashtirish konsepsiyasi doirasida soliq yukini kamaytirish va tadbirkorlik sub’ektlarini soliqqa tortishdagi nomutanosibliklarni qisqartirish bo‘yicha choralar amalga oshirildi.

Iste’mol bozorining barqarorligini ta’minlash, mahalliy ishlab chiqaruvchilarning raqobatbardoshligini oshirish uchun shart-sharoitlar yaratish, shuningdek, qo‘shilgan qiymat solig‘ining uzluksiz "zanjiri"ni shakllantirish maqsadida:

  1. 2019 yil 1 oktabrdan boshlab qo‘shilgan qiymat solig‘ining stavkasi 20 foizdan 15 foizgachapasaytirilsin.
  2. Davlat soliq xizmati organlari tomonidan soliq to‘lovchilarning tijorat banklaridagi hisobvaraqlari bo‘yicha operatsiyalarni to‘xtatib turishning amaldagi tartibi bekor qilinsin.

O‘zbekiston Respublikasi Moliya vazirligi Davlat soliq qo‘mitasi bilan birgalikda xorijiy mamlakatlarning ilg‘or tajribasidan kelib chiqib, O‘zbekiston Respublikasi Soliq kodeksining yangi tahriri loyihasida davlat soliq organlari tomonidan soliq to‘lovchining tijorat banklaridagi hisobvaraqlari bo‘yicha operatsiyalarni “tahlika-tahlil” natijalari va oldini olish choralarini ko‘rish asosida 30 kundan ortiq bo‘lmagan muddatga to‘xtatib turish tartibi belgilanishini nazarda tutsin.

  1. O‘zbekiston Respublikasi Vazirlar Mahkamasi O‘zbekiston Respublikasining 2020 yilgi Davlat budjeti loyihasini tayyorlashda:

davlat korxonalari, ustav jamg‘armasi (ustav kapitali)da davlat ulushi 50 foiz va undan ko‘proq bo‘lgan yuridik shaxslar, shuningdek, ustav jamg‘armasi (ustav kapitali)ning 50 foizi va undan ko‘proq qismi davlat ulushi 50 foiz va undan ko‘proq bo‘lgan yuridik shaxslarga tegishli bo‘lgan yuridik shaxslar hamda ularning tarkibiy tuzilmalari uchun yagona ijtimoiy to‘lov stavkasining 25 foizdan 12 foizgacha pasaytirilishini;

dividend shaklidagi to‘lanadigan daromadlarga soliq stavkasini saqlab qolgan holda, yuridik shaxslardan olinadigan foyda solig‘i stavkasining 15 foiz miqdorida belgilanishini;

qo‘shilgan qiymat solig‘ini hisoblash va to‘lashning soddalashtirilgan tartibi bekor qilinishini nazarda tutsin.

  1. Belgilansinki, ilgari O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi hisobiga to‘langan yagona soliq to‘lovi summasi 2019 yil 1 oktabrdan boshlab Qoraqalpog‘iston Respublikasi budjetiga, viloyatlar va Toshkent shahar mahalliy budjetlariga o‘tkaziladi.
  2. O‘zbekiston Respublikasi Davlat soliq qo‘mitasi, Davlat bojxona qo‘mitasi, Moliya vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari O‘zbekiston Milliy teleradiokompaniyasi, boshqa manfaatdor vazirlik va idoralar bilan birgalikda mazkur Farmonning mazmun-mohiyatini, shu jumladan, ommaviy axborot vositalari va Internet tarmog‘ida keng tushuntirilishini tashkil etsin.
  3. 2019 yil 1 oktabrdan boshlab O‘zbekiston Respublikasi Prezidentining ayrim hujjatlariga ilovaga muvofiq o‘zgartirish va qo‘shimchalar kiritilsin.
  4. Ushbu Farmonning ijrosini nazorat qilish O‘zbekiston Respublikasi Bosh vazirining o‘rinbosari – moliya vaziri J.A.Qo‘chqorov va O‘zbekiston Respublikasi Prezidentining maslahatchisi R.A.G‘ulomov zimmasiga yuklansin.

 

O‘zbekiston Respublikasi

       Prezidenti                             Sh.MIRZIYOEV

Toshkent shahri,

2019 yil 26 sentabr

 

O'zA

OVOZ BERISH
Ishonch telefonlarining xizmatini baholang:
 
A'lo
Yaxshi
Qoniqarli
Yomon

Моё мнение

Korrupsiyaga qarshi kurash

Tugmani bosing Tinglash