Welcome to navstat   Click to listen highlighted text! Welcome to navstat Powered By GSpeech

Портал

 

     Yangiliklarimizga obuna    bo'ling


O‘zbekiston Respublikasi Prezidentining q a r o r i

Xizmatlar sohasining mamlakatimiz iqtisodiyotidagi ulushini ko‘paytirish, joylarda xizmatlar sohasidagi mavjud imkoniyatlarni to‘liq ishga solish, xizmatlar turlarini kengaytirish va sifatini oshirish bo‘yicha o‘z yechimini kutayotgan muammoli masalalarni hal qilish, mazkur yo‘nalishda tadbirkorlik sub’ektlarini yanada qo‘llab-quvvatlash, ularning g‘oya va tashabbuslarini rag‘batlantirish maqsadida:

1. 2021-2023 yillarda O‘zbekiston Respublikasida xizmatlar sohasini rivojlantirishning asosiy yo‘nalishlari etib quyidagilar belgilansin:

iqtisodiy o‘sishni ta’minlashda xizmatlar sohasini muhim drayverga aylantirish va 2023 yilga qadar xizmatlar hajmini ikki baravarga oshirish;

aholiga tayyor biznes rejalar va loyihalar taqdim etish, ularni kasbga o‘qitishdan tadbirkorlik faoliyatini yo‘lga qo‘yishgacha bo‘lgan bosqichlarni qamrab oluvchi “kompleks xizmatlar” ko‘rsatishni tashkil etish;

respublikada xizmatlar sohasining rivojlanganligini baholash tizimini joriy etish orqali davlat organlari va tashkilotlarining bu boradagi faoliyati samaradorligini oshirish va mansabdor shaxslarning mas’uliyatini kuchaytirish;

xizmatlar sohasida ortiqcha byurokratik to‘siqlarni bartaraf etish, har bir hududning o‘ziga xos xususiyatlaridan kelib chiqib xizmatlar turlarini kengaytirish, hududlarda, ayniqsa, qishloq joylarda transport, moliyaviy, shuningdek, bank, turizm hamda savdo xizmatlari qamrovini kengaytirish;

respublikaning barcha hududlarida mavjud ta’lim va sog‘liqni saqlash xizmatlari salohiyatini oshirish, ularning sifatini yaxshilash, bunda xususiy sektorni jalb qilish uchun qulay iqtisodiy va infratuzilmaviy sharoitlarni yaratish.

2. Quyidagilar:

2021-2023 yillarda O‘zbekiston Respublikasida xizmatlar sohasini rivojlantirishning maqsadli parametrlari 1.1-1.15-ilovalarga muvofiq;

Xizmatlar sohasini rivojlantirish bo‘yicha 2021 yilga mo‘ljallangan “yo‘l xaritasi” 2-ilovaga muvofiq tasdiqlansin.

Iqtisodiy taraqqiyot va kambag‘allikni qisqartirish vazirligi (S.Xolxo‘jayev) manfaatdor vazirlik va idoralar bilan birgalikda 2022 va 2023 yillar uchun xizmatlar sohasini rivojlantirish bo‘yicha
“yo‘l xaritalari”ni har yili 1 dekabrga qadar ishlab chiqib, tasdiqlash uchun Vazirlar Mahkamasiga kiritib borsin.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda 2021-2023 yillarda xizmatlar sohasini rivojlantirish hududiy dasturlarini tasdiqlasin.

Bunda, hududiy dasturlarga tashabbuskor tadbirkorlarning g‘oyalari asosida aholining ehtiyoji mavjud xizmatlarni yo‘lga qo‘yish bo‘yicha loyihalarni kiritish, shuningdek, joylarda mazkur xizmatlarni ko‘rsatuvchi “xizmat ko‘rsatish majmualari”ni tashkil etilishi nazarda tutilsin.

4. 2021 yil 1 iyuldan boshlab respublika hududlarida quyidagilarni nazarda tutuvchi xizmatlar sohasining rivojlanganligi reytingi joriy etilsin:

xizmat ko‘rsatuvchi, shu jumladan, yangi tashkil etilgan sub’ektlar soni, xizmatlar hajmi va turlari, yaratilgan ish o‘rinlari, soliq bazasi va boshqa muhim ko‘rsatkichlar asosida tegishli sohalarga mas’ul bo‘lgan davlat organlari va tashkilotlari, ularning hududiy bo‘linmalari rahbarlari va boshqaruv xodimlari, shuningdek, Qoraqalpog‘iston Respublikasi Vazirlar Kengashi Raisi, viloyatlar, Toshkent shahar, tuman (shahar)lar hokimlari va ularning o‘rinbosarlari faoliyatini baholash;

xizmatlar sohasining rivojlanganligi reytingini “BUSINESS INDICATOR” avtomatlashtirilgan onlayn axborot tizimida shakllantirish, yuritish va e’lon qilish;

baholash natijalarini har yarim yilda O‘zbekiston Respublikasi Prezidenti Administratsiyasi va Vazirlar Mahkamasiga kiritish;

baholash natijalari bo‘yicha tegishli tashkilotlarning rahbar va boshqaruv xodimlari, shuningdek, Qoraqalpog‘iston Respublikasi Vazirlar Kengashi Raisining, viloyatlar, Toshkent shahar, tuman (shahar)lar hokimlari va ularning o‘rinbosarlari ijobiy ko‘rsatkichga ega bo‘lganda – ularni rag‘batlantirish hamda qoniqarsiz ko‘rsatkichga ega bo‘lganda – intizomiy javobgarlikka tortish.

5. Tiklanish va taraqqiyot jamg‘armasidan xizmatlar sohasini rivojlantirish uchun tijorat banklariga 300 million AQSH dollari ekvivalentida kredit liniyasi ochilsin.

Belgilansinki:

kredit liniyasining 150 million AQSH dollari miqdoridagi mablag‘lari (1-transh) 2021 yil 1 iyulgacha 3-ilovaga muvofiq taqsimot bo‘yicha ajratiladi;

kredit liniyasi mablag‘lari tijorat banklariga 7 yil muddatga, shu jumladan, 3 yillik imtiyozli davr bilan foiz stavkasi Markaziy bankning asosiy stavkasidan 4 foiz bandga past qilib beriladi;

kredit liniyasining 2-transhi 1-transhning ishlatilishi samaradorligini baholash natijalari bo‘yicha Iqtisodiy taraqqiyot va kambag‘allikni qisqartirish vazirligi taklifiga asosan Vazirlar Mahkamasi tomonidan tasdiqlangan taqsimot bo‘yicha ajratiladi;

tijorat banklari tomonidan kreditlar 4-ilovaga muvofiq xizmatlar sohasidagi loyihalarni amalga oshirish (moliya sohasini rivojlantirish bo‘yicha loyihalar va xizmatlar sohasida aylanma mablag‘larni to‘ldirish hollari bundan mustasno) uchun 5 yilgacha muddatga Markaziy bankning asosiy stavkasida bitta loyiha bo‘yicha 2 milliard so‘mgacha miqdorda ajratiladi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tijorat banklari kreditlari hisobiga amalga oshirilayotgan loyihalarga qo‘shimcha ravishda loyiha tashabbuskorlarining kamida yuqorida ko‘rsatilgan miqdorlardagi o‘z mablag‘lari hisobidan qo‘shimcha loyihalar ishga tushirilishini ta’minlasin.

6. “O‘zmilliybank” AJ tijorat banklariga qayta moliyalashtirish maqsadida 2021 yil yakuniga qadar 28 ta yirik va o‘rta shaharlarda turizm, transport, tibbiyot, ta’lim ob’ektlari va yirik savdo komplekslarini tashkil etish loyihalari uchun xalqaro moliya institutlarining 200 million AQSH dollari miqdoridagi mablag‘larini jalb qilsin.

7. “O‘zmilliybank” AJ huzurida Xizmatlarni rivojlantirish bo‘yicha loyiha-tahliliy markaz (keyingi o‘rinlarda – Markaz) tashkil etilganligi ma’lumot uchun qabul qilinsin.

Bandlik va mehnat munosabatlari vazirligi (N.Xusanov) Savdo-sanoat palatasi (A.Ikramov) va Markaz bilan birgalikda xizmatlar sohasidagi loyihalarni amalga oshirish uchun malakali mutaxassislarni jalb qilgan holda aholini kasbga o‘qitish bo‘yicha o‘quv kurslarini tashkil qilsin.

8. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

2021-2023 yillar davomida tashabbuskor tadbirkorlik sub’ektlari tomonidan 5-ilovaga muvofiq tuman (shahar)larda dehqon bozorlari va savdo komplekslari barpo etilishida ko‘maklashsin;

Turizm va sport vazirligi bilan birgalikda 2021 yil 1 sentyabrga qadar yirik shaharlarda, viloyat va tuman markazlarida tashabbuskor tadbirkorlik sub’ektlari bilan hamkorlikda savdo va ko‘ngilochar ko‘chalar tashkil etilishini ta’minlasin.

9. Yangi tashkil etiladigan dehqon bozorlari va savdo komplekslari ustav kapitalida mahalliy davlat hokimiyati organlarining majburiy ishtiroki bekor qilinsin.

10. Savdo va ko‘ngilochar ko‘chalarda:

ko‘chma savdo ob’ektlari uchun joylar tadbirkorlik sub’ektlariga elektron onlayn-auksion asosida sotilsin;

barcha tadbirkorlik sub’ektlariga jamoat xavfsizligi qoidalariga qat’iy rioya qilgan holda 24 soat mobaynida tunu kun faoliyat yuritish huquqi berilsin.

11. Ichki ishlar vazirligi Milliy gvardiya bilan birgalikda bir oy muddatda savdo va xizmat ko‘rsatish ob’ektlarining 24 soat mobaynida tunu kun faoliyat yuritishiga doir jamoat xavfsizligi bo‘yicha soddalashtirilgan talablarni o‘rnatishni nazarda tutuvchi Hukumat qarori loyihasini Vazirlar Mahkamasiga kiritsin.

12. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Ichki ishlar vazirligi (P.Bobojonov) hamda Davlat bojxona qo‘mitasi (M.Azimov) bilan birgalikda bojxona postlari hududidagi bo‘sh yer uchastkalari hamda 6-ilovaga muvofiq yo‘l-patrul xizmati postlari hududidagi yer uchastkalari tadbirkorlik sub’ektlariga savdo va xizmat ko‘rsatish ob’ektlarini barpo etish uchun ajratilishini ta’minlasin.

Davlat bojxona qo‘mitasi (M.Azimov) ikki hafta muddatda tegishli idoralar bilan birgalikda bojxona postlari hududidagi bo‘sh yer uchastkalarining tasdiqlangan ro‘yxatini o‘z rasmiy veb-saytiga joylashtirsin hamda Qoraqalpog‘iston Respublikasi Vazirlar Kengashi, viloyatlar, Toshkent shahar hokimliklariga taqdim etsin.

Belgilansinki, ushbu bandda nazarda tutilgan yer uchastkalari tadbirkorlik sub’ektlariga loyiha asosida savdo va xizmat ko‘rsatish maqsadlarida yengil turdagi qurilmalar barpo etish uchun kamida 3 yil muddatga ijaraga beriladi.

13. Davlat organlari va tashkilotlari joylashgan yer maydonlari va bino-inshootlardan samarali foydalanishni ta’minlash bo‘yicha ishchi guruhi 7-ilovaga muvofiq tashkil etilsin.

Ishchi guruhi (J.Qo‘chqorov) ikki oy muddatda:

ijtimoiy va ishlab chiqarish infratuzilmasini rivojlantirish dasturlari doirasida davlat organlari va tashkilotlari uchun bino va inshootlar qurishni maqbullashtirgan holda ularni tadbirkorlik sub’ektlariga tegishli binolarda ijara asosida joylashtirish tizimini keng joriy qilish choralarini ko‘rsin;

dastlabki bosqichda Toshkent shahrining Olmazor, Mirobod va Yakkasaroy tumanlarida davlat organlari va tashkilotlari joylashgan yer uchastkalari va bino-inshootlarni xatlovdan o‘tkazgan holda ularning maydonlarini tanqidiy ko‘rib chiqsin va tadbirkorlik sub’ektlariga xizmat ko‘rsatish ob’ektlarini barpo etish uchun ajratish maqsadida maqbullashtirish bo‘yicha Vazirlar Mahkamasiga takliflar kiritsin.

Bunda, davlat organlari va tashkilotlarida bo‘sh turgan, shu jumladan, O‘zbekiston Respublikasi Prezidentining 2021 yil 3 apreldagi PQ–5053-son qaroriga muvofiq shtat birliklari maqbullashtirilishi natijasida bo‘shagan yer uchastkalari, bino-inshootlar va joylar mavjudligi inobatga olinsin.

14. 2021 yil 1 sentyabrdan boshlab masofaviy (onlayn) ta’limga asoslangan nodavlat ta’lim xizmatlarini ko‘rsatish uchun mulkiy yoki boshqa ashyoviy huquqlar asosida binolarning mavjud bo‘lishi haqida talab bekor qilinsin.

15. Davlat statistika qo‘mitasi 2021 yil 1 oktyabrga qadar xorijiy va mahalliy ekspertlarni jalb qilgan holda xizmatlar statistikasini yuritishni, jumladan, axborot-kommunikatsiya va dasturlash xizmatlarini hisobga olish metodologiyasini xalqaro standartlar asosida takomillashtirsin, respublika hududlarida xizmatlar sohasining rivojlanish holatini hamda samaradorligini taqqoslash imkonini beruvchi hisobot shakllari va metodologiyalarni ishlab chiqsin.

16. Iqtisodiy taraqqiyot va kambag‘allikni qisqartirish vazirligi (S.Xolxo‘jayev) Davlat statistika qo‘mitasi, Davlat soliq qo‘mitasi, Savdo-sanoat palatasi, Axborot texnologiyalari va kommunikatsiyalarini rivojlantirish vazirligi, Bandlik va mehnat munosabatlari vazirligi, Adliya vazirligi va boshqa manfaatdor idoralar bilan birgalikda:

bir oy muddatda xizmatlar sohasining rivojlanganligini baholash tartibi va metodologiyasini nazarda tutuvchi normativ-huquqiy hujjat loyihasini Vazirlar Mahkamasiga kiritsin;

uch oy muddatda “BUSINESS INDICATOR” avtomatlashtirilgan onlayn axborot tizimining mazkur qaror talablaridan kelib chiqib takomillashtirilishini ta’minlasin;

bir oy muddatda qonunchilik hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

17. Mazkur qaror ijrosini samarali tashkil etishga mas’ul va shaxsiy javobgar etib Bosh vazir o‘rinbosarlari J.A.Qo‘chqorov va S.O‘.Umurzakov, Qoraqalpog‘iston Respublikasi Vazirlar Kengashi raisi, viloyatlar va Toshkent shahar hokimlari belgilansin.

Qaror ijrosini nazorat qilish O‘zbekiston Respublikasining Bosh vaziri A.N.Aripov va O‘zbekiston Respublikasi Prezidenti Administratsiyasi rahbari Z.Sh.Nizomiddinov zimmasiga yuklansin.

Amalga oshirilayotgan chora-tadbirlar natijadorligi yuzasidan 2021 yil 1 sentyabr va 2022 yil 1 yanvargacha O‘zbekiston Respublikasi Prezidentiga axborot berilsin.

 

O‘zbekiston Respublikasi

          Prezidenti                               Sh.MIRZIYOEV

Davlatimiz rahbari Toshkent shahridagi Texnoparkda ishga tushirilgan yangi korxonalarni borib ko‘rdi.

Bu yerda umumiy qiymati 365 million dollardan ziyod bo‘lgan 17 ta loyiha joylashtirilgan bo‘lib, shundan 6 tasi o‘tgan yili foydalanishga topshirilgan edi. Bu yil boshida yana 4 ta korxonada qurilish-montaj ishlari bitkazildi. Ayni kunlarda sinov rejimida mahsulot tayyorlanmoqda.

Prezident ushbu korxonalarda o‘rnatilgan texnologiyalar, ishlab chiqariladigan mahsulotlarni ko‘zdan kechirdi.

- Bu korxonalarning, albatta, iqtisodiy ahamiyati katta. Lekin meni ko‘proq quvontiradigani yoshlarimizning malakasi, ishonchi. Hozirgi yoshlar o‘qigan paytlarda bunaqa stanoklar yo‘q edi. Shu ishlarni 15 yil oldin boshlaganimizda bolalarimizning bilimi, saviyasi bugun umuman boshqacha bo‘lardi, - dedi Shavkat Mirziyoyev.

Furnitura va aksessuarlar loyihasining qiymati 20 million dollar. Buning evaziga bino mukammal ta’mirlanib, Turkiyadan zamonaviy uskunalar keltirib o‘rnatilgan. 450 ta ish o‘rni yaratilgan. Korxona eshik va romlar uchun yiliga 6 million dona furnitura va aksessuar ishlab chiqarish quvvatiga ega. Bu 10 million dollarlik import o‘rnini to‘ldirish, 3 million dollarlik eksport imkoniyatini beradi.

Yana bir korxonada 5 xil modifikatsiyadagi panelli isitish radiatorlari ishlab chiqariladi. Uning qiymati 19 million dollardan ziyod, quvvati yiliga 640 ming dona. Yevropa texnologiyasi asosida tayyorlanadigan bunday radiatorlarga ichki bozorda ham, tashqi boroda ham talab bor. Shundan kelib chiqib, 6 million dollarlik import o‘rnini bosish, 8 million dollarlikdan ko‘proq eksport qilish mo‘ljallangan. 250 kishi ish bilan ta’minlangan. 

Alyumin kompozit panellar korxonasi ham iqtisodiy samarador. Unda tayyorlanadigan 432 ming dona mahsulot 10 million dollarlik import o‘rnini to‘ldirish, 3 million dollarlik eksportni ta’minlash imkonini beradi. Buning uchun 2 million dollar evaziga Xitoy texnologiyasi o‘rnatilgan. 80 ta ish o‘rni yaratilgan.

Metall konstruksiyalar ishlab chiqarish loyihasining qiymati 29 million dollar. Shunga yarasha, import o‘rnini bosish darajasi ham nisbatan yuqori – 16 million dollar. Shuningdek, 1,5 million dollarlik eksport ham rejalashtirilgan. Korxonaga Italiya texnologiyasi o‘rnatilgan bo‘lib, 3 xil sendvich panellar hamda 2 turdagi qora va yengil metall konstruksiyalar ishlab chiqariladi. Bu yerda 350 kishi ishlaydi.

Yangi ishga tushayotgan korxonalarda mahalliylashtirish darajasi 35-40 foizni tashkil etadi.

Texnoparkda barcha loyihalar ishga tushgandan keyin joriy yil yakunida 5 trillion 700 milliard so‘mlik mahsulot ishlab chiqariladi, 105 million dollarlik eksport qilinadi. 7 mingga yaqin kishi ish bilan ta’minlanadi.

Davlatimiz rahbari shu bilangina cheklanmasdan, yangi loyihalar ishlab chiqish, qo‘shilgan qiymat yaratadigan mahsulotlarga e’tibor qaratish zarurligini ta’kidladi.

Prezident Shavkat Mirziyoyev Yashnobod tumanidagi Parvoz mahallasida bo‘lib, aholi hayoti bilan tanishdi.

Mamlakatimizda har bir mahalladagi «o‘sish nuqtalari»ni aniqlab, aholini tadbirkorlikka va o‘zini o‘zi band qilishga jalb etish, kommunal muammolarni hal qilib, hududini obodonlashtirish choralari ko‘rilmoqda. Parvoz mahallasiga tashrif chog‘ida shu boradagi ishlar ijrosiga e’tibor qaratildi.

Bu yerdagi 41 ta ko‘p qavatli uyga “Shinam uy-joy” boshqaruv servis kompaniyasi sifatli xizmat ko‘rsatmoqda. Davlatimiz rahbari ushbu shirkat binosini kirib ko‘rdi.

Kompaniyada tunu kun dispetcherlik xizmati yo‘lga qo‘yilgan. 35 doimiy, 20 dan ziyod mavsumiy ish o‘rni yaratilgan. Binoda «Xalq banki» bo‘limi ham tashkil etilgan.

Hududda maktabgacha ta’lim muassasalari, maktab, sport maydonchalari bor. Prezident shu yerda o‘ynayotgan bolalarga ezgu tilaklar bildirdi.

- Bolalarimiz sog‘lom bo‘lib, ko‘zlaridan nur yog‘ilsa, men uchun eng katta baxt shu. Sizlarning bilim olishingiz, kasb-hunarlar egallashingiz, sport bilan shug‘ullanishingiz uchun hamma sharoitlarni yaratishga harakat qilyapmiz. Sizlar yaxshi o‘qib, al-Xorazmiy, Mirzo Ulug‘bek bobolarimizga munosib bo‘lib, ota-onangiz orzularini ushaltiradigan insonlar bo‘lib ulg‘aying, - dedi Shavkat Mirziyoyev.

Mahallada savdo va xizmat ko‘rsatish sohalarida 157 kichik biznes sub’ekti bor. Aholini ish bilan ta’minlash maqsadida joriy yilda umumiy qiymati 73 milliard so‘m bo‘lgan 6 ta loyihani amalga oshirish va 310 ta yangi ish o‘rni yaratish rejalashtirilgan.

- Bu Toshkent shahridagi eng katta mahallalardan biri - 10 ming 200 nafardan ziyod aholi yashaydi. Bu yerda shunday ishlar qilingani boshqa mahallalarga namuna bo‘lishi kerak, - dedi Prezident.

Mutasaddilarga poytaxtimizdagi barcha 524 ta mahallani shunday obod qilish, buning uchun har biriga mablag‘ ajratib, loyihalarini tasdiqlash bo‘yicha topshiriq berildi.

Shu yerda nuroniylar, jamoatchilik vakillari bilan samimiy suhbat bo‘ldi.

– Ulug‘ ayyom kunlarda sizlar bilan ko‘rishganimdan xursandman. Mehr ko‘zda degandek, yoshlar, nuroniylar bilan gaplashsam o‘zimga kuch, katta rejalar olaman. Odamlarning har bir gapi menga mas’uliyat bag‘ishlaydi. Xalqimizni rozi qilsak, inshoolloh, ajri ham bo‘ladi, - dedi Prezident.

17 mart kuni O‘zbekiston Respublikasi Prezidenti Shavkat Mirziyoyev va Qozog‘iston Respublikasi Birinchi Prezidenti – Elboshi Nursulton Nazarboyevning telefon orqali muloqoti bo‘lib o‘tdi.

Suhbat avvalida ikki mamlakat yetakchilari bahoriy Navro‘z ayyomi munosabati bilan bir-birini samimiy qutlab, qardosh xalqlarimizga tinchlik, farovonlik va ravnaq tiladilar.

O‘zbekiston va Qozog‘iston o‘rtasidagi ko‘p asrlik do‘stlik, yaxshi qo‘shnichilik va strategik sheriklik munosabatlarini yanada mustahkamlashning dolzarb masalalari ko‘rib chiqildi.

Ko‘p qirrali hamkorlikni kengaytirish, savdo sohasidagi qo‘shma loyihalarni ilgari surish, sanoat kooperatsiyasini kuchaytirish va transport infratuzilmasini rivojlantirish, hududlararo aloqalar va gumanitar almashinuvlarni faollashtirishga alohida e’tibor qaratildi.

Turkiy kengashning bo‘lajak sammitiga tayyorgarlik ko‘rish masalalari ham muhokama qilindi.

Muloqot har doimgidek ochiq, samimiy va do‘stona ruhda o‘tdi.

O‘zbekiston Respublikasi Prezidenti Shavkat Mirziyoyev va Germaniya Federal kansleri Angela Merkel 12 mart kuni videoanjuman shaklida uchrashuv o‘tkazadilar.

Ikki mamlakat yetakchilari ko‘p qirrali O‘zbekiston-Germaniya sherikligini yanada kengaytirishning dolzarb masalalarini ko‘rib chiqishlari ko‘zda tutilgan.

Oliy darajadagi uchrashuvlarda erishilgan kelishuvlarni amalga oshirish, konstruktiv siyosiy muloqotni rivojlantirish, savdo-iqtisodiy, investitsiyaviy, moliyaviy-texnik va madaniy-gumanitar hamkorlikka doir qo‘shma loyiha va dasturlarni ilgari surish masalalariga alohida e’tibor qaratiladi.

Muzokaralarda xalqaro va mintaqaviy ahamiyatga molik dolzarb masalalar yuzasidan ham fikr almashiladi.

Eslatib o‘tamiz, O‘zbekiston Respublikasi Prezidenti 2019 yil yanvar oyida rasmiy tashrif bilan Germaniya Federativ Respublikasida bo‘ldi, o‘sha yilning may oyida esa Germaniya Prezidenti Frank-Valter Shtaynmayer javob tashrifi bilan O‘zbekistonga keldi.

Germaniya O‘zbekistonning muhim iqtisodiy, investitsiyaviy va texnologik sheriklaridan biridir.

O‘tgan yil yakunlariga ko‘ra o‘zaro tovar ayirboshlash 829 million dollarni tashkil etgan, mamlakatimizda Germaniyaning 700 million dollardan ziyod investitsiyalari o‘zlashtirilgan. O‘zbekistonda 200 ga yaqin qo‘shma korxona faoliyat yuritmoqda.

OVOZ BERISH
Ishonch telefonlarining xizmatini baholang:
 
A'lo
Yaxshi
Qoniqarli
Yomon

Моё мнение

Korrupsiyaga qarshi kurash

Tugmani bosing Tinglash